بھارت نا کنڈآن سیزفائر آ رضامندی ستاکڑزک، بھارت ءِ سفاانگا نیت اٹ دا سیز فائر معاہدہ نا پاسداری ءِ کروئی مریک، وزیر خارجہ مخدوم شاہ محمودقریشی نا بیان

اسلام آباد۔ 25فروری (اے پی پی) وزیر خارجہ مخدوم شاہ محمود قریشی پاک بھارت سیز فائر امنائی ءِ اہم ءُ پیش رفت اس گوندسا پارے کہ بھارت نا کنڈآن سیز فائرآ رضامندی ستاکڑزک و آخبت کن اسہ جوان ءُ بنااس پک مننگ کیک بھارت ءِ ساف انگا نیت اٹ دا سیزفائر معاہدہ نا پاسداری ءِ کروئی مریک۔  بھارت نا 5 اگست 2019 ء نا اسہ کنڈی گام گیج آن پد چاگڑد اٹ ہرا بگاڑ ودی مس اونا سہی کننگ کن دادے اہم ءُ موقع اس تکیوہ۔ پنچ شنبے نادے آ پاک بھارت سیز فائر معاہدہ نا بابت وزیر خارجہ اہم بیان اٹی پارے کہ پاکستان و بھارت نا نیام اٹ اخس سی بی ایم مس اوفتے ٹی غٹ آن اہم سیز فائدہ معاہدہ ئس۔ بھارت نا کنڈآن سیز فائر معاہدہ نا خلاف ورزی تا برخلاف نن پدریسہ برانز کرسا کرین۔ وزیر خارجہ پارے کہ ای اقوام متحدہ نا سیکرٹری جنرل و سلامتی کونسل نا صدر ءِ کیہی چھٹی مون تسٹ و جہانی برادری نا چکار ءِ دا کنڈآ کرفین، نن پیدوار کرین کہ سیز فائر خلاف ورزی تیان ننا کودک شاری تے شست کننگ انگ ءِ۔ اوپارے کہ سیز فائر معاہدہ نا خلاف ورزی آن ہراڑے ڈیہہ ٹی تناؤ ودنگ ءِ ہموڑے امن و ایمنی ءِ بھاز گڑتی مون تروک مننگ ءِ۔ وزیر خارجہ پارے کہ ای اینو پاک بھارت سیز فائر امنائی ءِ اسہ اہم ءُ پیش رفت اس سرپند کیوہ، داآخبت کن اسہ جوان ءُ بنااس پک مننگ کیک بھارت ءِ ساف انگا نیت اٹ دا سیز فائر معاہدہ نا پاسداری ءِ کروئی مریک۔ وزیر خارجہ پارے کہ ہراتم اسکان چاگڑد سازگار مفک نن مقبوضہ کشمیر نا ویل آ پیش رفت امر کننگ کینہ۔ کنا جہانی برادری تون ہراتم کہ رابطہ مس ای اودے ڈیہہ نا امن وایمنی ءِ مون تروک گڑتی تیان معلومدار کریٹ۔ اوپارے کہ بھارت سرکار ءِ تینا کشمیر پالیسی آ نظرثانی کروئی مریک۔ کشمیر، دہلی سرکار نا غلط پالیسی تا سوب آن اوفتیان مُرمسنے۔ اینو بزغرآک بھارت سرکار نا رویہ غان بدبیسہ ءُ و برانز کننگ ءُ۔ وزیر خارجہ پارے کہ اگہ بھارت دا معاہدہ نا پاسداری ءِ کیک تو دا آخبت نا کنڈآ اسہ مثبت ءُ گام اس مریک۔ بھارت نا 5 اگست 2019ء نا اسہ کنڈی گام آن پد چاگڑد اٹ ہرا بگاڑ ودی مس اونا سہی کننگ کن اودے اہم موقع اس سرپندکیوہ۔ اوپارے کہ پاکستان، ہمسایہ ملک آتون پرامن تعلقداری تا خواہندار ءِ۔ ای بھارت نا کنڈآن سیز فائر آ رضامندی ءِ ’’دیرآید درست آید‘‘ سرپند کیوہ۔