اسلام آباد۔ 25 فروری (اے پی پی) بنجائی وزیر ریلوائی اعظم خان سواتی تون بنجائی وزیر نجکاری میاں محمد سومرو و وزیراعظم نا سلاہکار عشرت حسین پنچ شنبے نادےآ داڑے اوڑدہی کریر۔ اوڑدہی ٹی ہڑتوم آ راہشون تا نیام اٹ چندی امور آ ہم گپ وتران مس۔ ہڑتوم آ راہشونک بنجائی وزیر ریلوائی ءِ پوسکن آ منصب ءِ سنبھالنگ آ مبارکبادی تسر و نیک است خواہی نا درشانیءِ کریر۔ وزیر ریلوائی پارے کہ او وزیراعظم عمران خان نا پت آ اونا منت وار ءِ ہرا داخہ اہم ءُ منصب اسے نا زمواری ءِ اودے تس۔ اوڑدہی ٹی ریلوائی پروجیکٹ آتا بابت گپ وتران مس۔ ریلوائی نا برجا شونداری ڈٹ آتے تخوک آ مد اٹ ایسر اسکان سرکننگ ننا غٹ انا اولیت مرے۔ وزیر ریلوائی پارے کہ نن ریلوائی ءِکٹیا کروک ادارہ اس جوڑ کینہ، ساڑی انفراسٹرکچر ءِ اپ گریڈ کینہ، مزور آتا کمک اٹ ریل ءِ چلیفینہ، ریلوائی ٹی سیفٹی آ پبی چکار کننگ اُن، ریلوائی ءِ بزنس ماڈل آ اتنگ اُن، ریلوائی ٹی شونداری نا بھاز لائخی ارے، نن ریلوائی ءِ بزنس ماڈل نا رداٹ چلیفینہ۔ بنجائی وزیر ریلوائی مستی پارے کہ کنا مشن ءِ کہ ای پاکستان ریلوائی ءِ کٹیا کروک ءُ ادارہ اس جوڑ کیو۔
