ورناک ننا آخبت ءُ، قبائلیک اسُل تینا لمہ دھرتی نا سودا ءِ کپسہ، شہریار آفریدی

ملتان۔ 25 فروری (اے پی پی) چیئرمین پارلیمانی کمیٹی کشمیر شہریار آفریدی پارینے کہ ننے دنیا نا شون ہلوک قوم تا مقابلہ ءِ کننگ کن غٹ بشخ آتیٹی مون آ ہنوئی مریک و داکاریم ءِ ننا ورنا چینک گچین وڑاٹ کننگ کیرہ۔ مودی نا دروشم دنیا نا مون آ پاش مسنے و اونا عزم پاش آن پاش مون آ بسنے۔ مسلم ملک آک یکجا مفننگ نا سوب آن اینو مشکل آتا گواچی ءُ۔ پختون تحفظ موومنٹ( پی ٹی ایم) ءِ پاننگ خواوہ کہ ورناک ننا ملک انا آخبت ءُ و قبائلیک اسُل تینا لمہ دھرتی نا سوداءِ کپسہ۔ ننے تینا ہیروتے تینٹ جوڑ کروئی مریک۔ داخیال آتا درشانی ءِ او میاں نواز شریف کشاری یونیورسٹی ٹی پنچ شنبے نادے آ انتہاپسندانہ رویہ غاتا چٹفنگ نا سرحال آ اڈ ہلوک آ کانفرنس آن تران کرسا کرے۔ اومستی پارے کہ اینو نادے بھاز اہمیت تخک انتئے کہ ای اینو دا درس گاہ ٹی روشنا و توانا دروشم آتے خننگ اٹی اُٹ و دا ورناک ننا ملک انا روشنا آخبت نا ضمانت ءُ۔ اوپارے کہ ہراقومک شونداری نا کسرآ آخبت کارہ اوفتے ٹی بنداوی کڑد اوفتا ورناتا مریک و ننے تینا ورناتے تینا لائخی تے منفنگ کن اوفتیکن جوان ءُ پلیٹ فارم اس مہیا کننگ ءِ۔