اقوام متحدہ۔ 25 فروری (اے پی پی) پاکستان اقوام متحدہ نا سلامتی کونسل نا دیوان اٹی پارینے کہ بھارت نا مقبوضہ کشمیر آ غیر کانودی فوجی کوزہ اونا اقوام متحدہ نا چارٹر نا بدترین خلاف ورزی تیان اسٹ ءِ و داکہ کشمیری الس نا امنا کروک حق خودارادیت کن اوفتا جہد ءِ دہشت گردی تون گنڈنگ مفک۔ اقوام متحدہ ٹی پاکستان نا آخبتی مندوب منیر اکرم اقوام متحدہ نا سلامتی کونسل نا غیر رسمی دیوان اٹ تران کرسا پارے کہ 11 ستمبر 2001ء نا دہشت گردانہ جلہو آتیان پد، جہانی دہشت گردی نا برخلاف جنگ ءِ اسہ کنڈی واک انا کاریم اٹ اتنگ و درملکی نیام تمنگ نا سوب کن کاریم اٹ اتنگا۔ اوپارے کہ اقوام متحدہ نا چارٹر نا مسخت جنگ انا کنڈآ ہنوک آ کسر ءِ غیر کانودی گوندگ ئس ولے بدبختی اٹ اینو نا حالیت آتیٹی درملکی کوزہ و نیام تمنگ، حق خودارادیت نا حق تننگ آن انکار و نزور و چنکا ریاست آتیٹی دباؤ نا کمک اٹ واک انا اسہ کنڈی و غیر مستند کاریم اٹ اتنگ بھاز زیات خننگک۔ اوپارے کہ پاکستان ءِ ہمسایہ ملک بھارت نا سیم انا ایپار آن دہشت گرد رڑتا کنڈآن جلہو آتا مون تروک ءِ و پاکستان دا دہشت گردانہ جلہو آتا سرپرستی ءِ کروک آ ریاست نا برخلاف تینا دفاع نا حق ءِ برقرار تخسا تینا ہمسایہ ریاست آتا علاقائی وتواجہی نا شرف ءِ کرینے۔ اوزور شاغاکہ داڑتون اوار مخلوق نا حق خودارادیت نا جہد ءِ دہشت گردی تون گنڈنگ مفک و حق خودارادیت نا امنا کروک حق تخوک آ کشمیری الس ءِ اوفتا حق ءِ تفننگ انگ ءِ بلکن زوراکی اٹ زور شاغنگ انگ ءِ ہنداخاطرآن کشمیری الس ءِ دا حق ارے کہ او اقوام متحدہ نا چارٹر و جنرل اسمبلی نا قرارداد آتا رداٹ تیناحق خودارادیت کن سلہہ بند جہد تون اوار غٹ ممکنہ وسیلہ غاتا سیبوءِ ہلیر و داآخا کشمیری الس ءِ دا حق ہم دوئی ءِ کہ او تینا حق خودارادیت نا دوئی کننگ نا روا جہد کن اخلاقی و مادی مخ تفی دوئی کیر۔
