اسلام آباد۔ 25 فروری (اے پی پی) اسپیکر قومی اسمبلی اسد قیصر تون پنچ شنبے نادے آ پارلیمنٹ ہاؤس اٹ پاکستان کن اوغان صدر نا نمائندہ خصوصی عمرداؤد زئی اوڑدہی کرے ہراٹی ہڑتوم آ کنڈآتا تعلقداری، واپار نا مون آ دننگ تون اوار تین پہ تینی است خواہی نا ایلو باندات آ گپ وتران کننگا۔ داوخت آ گپ وتران کرسا اسپیکر قومی اسمبلی اسد قیصر پارے کہ پاکستان و اوغانستان نا الس اخوت، دودوربیدگ و تاریخ نا لازوال رشتہ غاتیٹی تفوک ءُ، پاکستان اوغانستان اٹ امن کن اوغان حکومت و الس تون ہم کوپہ سلوک ءِ۔ اوپارے کہ سوگو اوغانستان پاکستان و ڈیہہ ان گچین فائدہ ٹی ءِ۔ اوپارے کہ پاکستان نا ساڑی حکومت اوغانستان تون وسیع البنیاد واپار و زرکاری ءِ مون آ دننگ خواہک، پاکستان نا است خواہی ءِ کہ سی پیک ڈٹ آن اوغانستان فائدہ ہرفے۔ سی پیک ڈٹ ڈیہہ ٹی زرگزرانی و اقتصادی شونداری کن گیم چینجر ڈٹ اس مریک۔ جغرافیائی اعتبار اٹ اوغانستان نیامی ایشیاکن گیٹ وے نا حیثیت تخک۔ اوپارے کہ پاک، اوغان واپار و زرکاری کن قومی اسمبلی نا پاک، اوغان فرینڈ شپ پڑک نا ایگزیکٹو کمیٹی نا مرتب کروک سلاہ و سوج آتیا عملدرآمد مننگءِ، اوغان طالب علم و ناجوڑ آتیکن ویزہ پالیسی ٹی نرمی آن اوغان الس پاکستان اٹ جان جوڑی و تعلیم نا آسراتی آن فائدہ ہرفنگ کیرہ۔ اوپارے کہ اوغان پوریاگرآتیکن مریس مدتی ویزہ نا جاری کننگ آن ہڑتوم آ ملک آتیٹی واپاری سرجزآتیٹی ودکی مریک۔ داوخت آ نمائندہ خصوصی اوغان صدر پارے کہ پاکستان و اوغانستان نا سیاسی سرکڑدہ غاتا نیام اٹ رابطہ ستاکڑزک۔ اوغان الس پاکستان تون تینا دوستانہ تعلقداری و ایلمی نا بنداو آ جوڑ رشتہ غاتے قدر انا نظراٹ ہرک۔ اوپارے کہ اوغانستان اٹ امن کن پاکستان نا خذمت ستاکڑزک۔ اوپارے کہ اوغانستان اٹ پاکستان نا کمک اٹ برجا ڈٹ آتیکن اوغان الس پاکستان نا منت وار ءِ، پاکستان و اوغانستان نا سیاسی و پارلیمانی سرکڑدہ غاک ہڑتوم آ ملک آتے پین خڑک اتیرہ۔
