ڈٹ انا انٹرنیشنل ٹینڈر ءِ بروک آ ہفتہ اخبار آتیٹی شینک کرفنگک، کمشنر راولپنڈی
اسلام آباد۔ 25 فروری (اے پی پی) بنجائی وزیر ڈٹ بندی شونداری و اصلاحات و خصوصی گام گیج اسد عمر پارینے کہ رنگ روڈ ڈٹ راولپنڈی شار انا تہہ ٹی ٹریفک نا نظام ءِ گچین کننگ اٹ بھاز کمکار مریک، شاری تا ٹریفک نا ویل ایسر مریک و علاقہ ٹی زرگزرانی سرجزآتیٹی ترندی بریک، ڈٹ انا امور نا ٹائم لائن ءِ زوت پک کننگ و ترندی اٹ باندات آتے مون آ دننگے دا ڈٹ انا پک کروک ٹائم لائن اٹ ہچ ءُ بایدے تاخیر اس مف۔ پنچ شنبے نادے آ کمشنر راولپنڈی محمد محمود بنجائی وزیر ڈٹ بندی شونداری و خصوصی گام گیج اسد عمر ءِ جاڑانگا شار تا فلیگ شپ ڈٹ رنگ روڈ آ برجا شونداری کاریم تا پیش رفت نا بابت معلومدار کرے۔ دیوان اٹی وزیراعظم نا خصوصی کمکار سی ڈی اے علی نواز اعوان و وزارت ڈٹ بندی نا بڑزکوعہدیدارآک ساڑی ئسر۔ اسلام آباد اٹی مروک آ حوال اٹ کمشنر راولپنڈی محمد محمود بنجائی وزیر ءِ پارے کہ رنگ روڈ انا سلاہ کروک مرغنی 64 کلومیٹر ءِ ہراروات آن بناکیک و اوکان پد اسلام آباد تون منسلک مننگ کن ایم ۔ 2 و ایم۔ 1 آن مرسا دا سڑک این ۔5آن گدرینگسا سنگجانی آ ایسر مریک۔ دا سڑک آ شش لین و ہشت انٹرچینج مریک۔ رنگ روڈ ڈٹ انا ساڑی پیش رفت آ گپ وتران کرسا کمشنر راولپنڈی نا پاننگ ئس کہ رنگ روڈ ڈٹ انا فزیبلٹی سٹڈی پورو مسنے،الائمنٹ ءِ گڈیکو دروشم اس تننگانے۔ پنجاب پبلک پرائیویٹ اتھارٹی نا کمک اٹ بپلک پرائیویٹ اتھارٹی نا سلاہ ہم منظور مسنے، 65 کلومیٹر سنگجانی اسکان حدبندی کننگانے، ڈغار نا دوئی کننگ کن معاوضہ نا زرتس نا ہم بنامسنے۔ سڑک نا تفنگ کن چندی محکمہ غاتیان المی موکل نامہ جاری کننگانے، انٹرنیشنل ٹینڈر تیار ءِ ہرابروک آ ہفتہ اخبار آتیٹی تننگک۔ بنجائی وزیر اسد عمر پیش رفت نا بابت راولپنڈی نا انتظامیہ نا کاریم نا ستاءِ کرے۔
