اسلام آباد۔ 25 فروری (اے پی پی) چین پاکستان اقتصادی راہداری ڈٹ انا رداٹ صنعتی شونداری و کشت وکشار آ چکار کننگ انگ ءِ۔ سی پیک اتھارٹی نا کمامدار آک اے پی پی ءِ پاریر کہ صنعت و کشت وکشار ہڑتوم آ بشخ آک پاکستان نا شونداری کن کلیدی ءُ اہمیت اس تخرہ۔ دا ہمو اِرا بشخ آک ءُ ہرافتے ٹی پاکستان وخت انا خواست آتا رداٹ شون ہلتنے و ہندا سوب آن پاکستان ءِ زرگزرانی مشکل آتا مون تروک مسنے۔ سی پیک نا رداٹ ارٹ میکو ریسہ ٹی دا ہڑتوم آ بشخ آتیا خاص چکار کننگ انگ ءِ و دامسخت نا دوئی کننگ کن سرجم ڈٹ آتے شین تننگانے ہرافتیا کاریم نا بناءِ کننگانے۔ سی پیک نا ارٹ میکو ریسہ واپاری بے بریبری نا ویل انا مون ءِ توننگ اٹ بھاز کمکار مریک۔ ارٹ میکو ریسہ ٹی بنداوی پنجر نا شونداری نا کمک اٹ صنعتی شونداری، کشت و کشار نا میکانائزیشن، سیل و سوات،ہائی ٹیک فنانس و راجی شونداری آ خاص چکار کننگ انگ ءِ۔ ملک انا تہہ ٹی خصوصی اقتصادی زوم جوڑ کننگ انگءِ ہراڑآن پیدواری لائخی ودک، کثیر واپاری سرجزودکی مریک و پاکستان نا برآمد آتیٹی ودکی مریک۔ پاکستان نا ودوک آ آبادی نا خور انا گرج آتے پورو کننگ کن کشت وکشار ءِ شون تننگ نا سخت گرج ءِ۔
