ڈاکٹرو ایلو ملازم آتے کورونا دین آن بچفنگ نا اولیکو وار ویکسی نیشن پورو مننگ آن پد پنچ شنبے نادے آ ارٹ میکو وار ویکسین خلنگ نا عمل نا بناءِ کننگانے ہرادے زوت پورو کننگک، ڈاکٹر کمالان گچکی

کوئٹہ۔ 25فروری(اے پی پی) بولان میڈیکل ہسپتال کوئٹہ نا میڈیکل سپرنٹنڈنٹ ڈاکٹر کمالان گچکی پارینے کہ بی ایم سی نا ڈاکٹر و ایلو ملازم آتے کورونا دین آن بچفنگ نا ویکسی نیشن خلنگ نا اولیکو ریسہ پورو مننگ آن پد ارٹ میکو وار ویکسین خلنگ نا عمل نا بناءِ کننگانے۔ داہیت ءِ او پنچ شنبے نادے آ کورونا دین آن بچفنگ نا ارٹ میکو وار ویکسین خلنگ نا وخت آ صحافی تتون گپ وتران کرسا پارے۔ داوخت آ ڈی ایم ایس بی ایم سی ڈاکٹر رشید جمالی و ایلوفک ہم ساڑی ئسر۔ ڈاکٹر کمالان گچکی پارے کہ بولان میڈیکل ہسپتال کن کورونا دین آن بچفنگ نا 600 ویکسین تننگاسس ہرافتیان 500 آن زیات ڈاکٹر، پیرامیڈیکل اسٹاف، نرس و ایلو عملہ ءِ کورونا دین آن بچفنگ نا ویکسین خلنگا۔ اوپارے کہ ڈاکٹرو ایلو ملازم آتے کورونا دین آن بچفنگ نا اولیکو وار ویکسی نیشن پورو مننگ آن پد پنچ شنبے نادے آ ارٹ میکو وار ویکسین خلنگ نا عمل نا بناءِ کننگانے ہرادے زوت پورو کننگک۔ اسہ سوج اسے نا ورندی ٹی ڈاکٹر کمالان گچکی پارے کہ بولان میڈیکل ہسپتال نا ڈاکٹر، پیرامیڈیکل اسٹاف، نرس و ایلو عملہ منشاکارانہ وڑاٹ کورونا دین آن بچفنگ نا ویکسین خلکونو و ننے ویکسی نیشن اٹ ہچ وڑنا مشکل آتون مون تروئی تمیتو۔