کوئٹہ۔ 25 فروری (اے پی پی) بنجائی وزیر مذہبی امور و بین المذاہب ہم آہنگی پیر نورالحق قادری پارینے کہ پاکستان نا کنڈآن اقوام متحدہ ٹی جہانی مذہب آتا شرف و انسانیت نا شرف نا قرارداد نا منظور مننگ اسہ عظیم ءُ سرسہبی اسے۔ ہراڑآن اینو مچ آ دنیا ءِ اہم ءُ کلہو اس تننگانے۔ پاکستان اٹ اقلیتی برادری تون پاکستان نا آئین و بانی پاکستان حضرت قائد اعظم محمد علی جناح نا راہشون اصول آتا رداٹ ہم آہنگی ءِ مون آ دننگ انگ ءِ۔ بے رنگ و نسل، زبان، دین و مذہب و علاقائیت نا بیرہ انسانیت نا ناطہ نن داڑے مچ مسونن۔ ننا غٹ انا داڑے تولنگ مہرومریبت و امن نا کلہو ءِ۔ مسلمان تا تاریخ اٹ سگ و رواداری اوار ءِ، پاکستان اٹ تاریخی کلچر، ست رنگی، روداری نا رداٹ اسہ ایلو ءِ امنا کننگک، کانفرنس اٹ اخس کہ مذہبی راہشونک امن و ایلمی، مذہبی آہنگی نا اسٹیج آ درس تسنو، اوفتے مہراب، منبر،امام بارگاہ، گرجاگر، مندر گوردوارہ غان ہم ہنداکلہو ءِ تالان کروئی مرے۔ ریجن اٹ پاکستان اقلیتی برادری تون اسہ جوان ءُ رویہ اس تخانے۔ ہالانکہ بھارت مسلمان، سکھ برادری تون اوار ایلو اقلیت آتون ناروا سلوک کرینے۔ داخیال آتا درشانیءِ او پنچ شنبے نادے آ کوئٹہ ٹی وزارت مذہبی امور بین المذاہب ہم آہنگی نا کنڈآن ’’بین المذاہب ہم آہنگی ‘‘ کانفرنس تین پہ تینی مذہبی شرف، ساڑی آ دور انا گرج‘‘ آن تران کرسا کرے۔ بنجائی وزیر مذہبی امور پیر نورالحق قادری پارے کہ اسہ ایلو نا مذہبی سرکڑدہ و عبادت گاہ تا شرف ءِ ملحوظ خاطر تخنگے، مذہبی جھیڑہ و اختلاف آتے تین پہ تینی مشورہ، افہام و تفہیم و سنجیدگی اٹ طے کننگے۔ اوپارے کہ داکانفرنس نا مسخت بین المذاہب ہم آہنگی ءِ مون آ دننگ، ایلمی نا پرچار کننگ ءِ۔ اوپارے کہ پارلیمنٹ اٹ اقلیتی برادری نا بابت ہچ ءُ بل اس مسترد متنے، وزیراعظم عمران خان نا کماشی ٹی ساڑی حکومت اقلیتی برادری ءِ رکھ تننگ و اوفتے حق تننگ اٹ متاماری کننگ ءِ۔ کانفرنس آن بنجائی سیکرٹری مذہبی امور بین المذاہب ہم آہنگی سردار اعجاز خان جعفر، مولانا عبدالخبیر آزاد چیئرمین رویت ہلال کمیٹی، عبدالفتح بھنگر، سیکرٹری اقلیتی امور حکومت بلوچستان، حزب اللہ عثمانی، سید حبیب اللہ چشتی، قاری نعیم اللہ، ڈاکٹر امانت مسیح، ڈاکٹر فائزہ، خورشید بروچہ و ایلوفک ہم تران کریر۔
