کوئٹہ۔ 25 فروری (اے پی پی) جامعہ بلوچستان نا اکیڈمک کونسل نا 84 می دیوان وائس چانسلر پروفیسر ڈاکٹر شفیق الرحمان نا کماشی ٹی جامعہ نا آڈیٹوریم اٹ اڈ ہلک۔ ہراٹی جامعہ نا ڈین فیکلٹیز، سینئر استاد، جامعہ نا رجسٹرار تون اوار کونسل نا ایلو باسک آک ساڑی ئسر۔ دیوان اٹی تعلیمی، پٹ وپولی ایجنڈاغا سجفنگا۔ ہراٹی بڑزکو تعلیم پٹ و پول نا مون آ دننگ، بی ایس، ایم ایس ڈگری پروگرام، داخلہ و امتحان تا وڑوڈول ، کارکڑد، آخبت نا تعلیمی ڈٹ آتون اوار چندی باندات آتیا سجفنگا و چندی فیصلہ غاتے کننگا۔ داوخت آ جامعہ نا وائس چانسلر تران کرسا پارے کہ پالیسی ساز ادارہ غاتا ودفنگ و آخبت نا تعلیمی خواست آتے مون آ تخسا پالیسی شین تننگ المی ءِ۔ و گرج داہیت انا ءِ کہ مارکیٹ تون مطابقت تخوک آ بشخ آتا جوڑ کننگ و پروفیشنل ڈگری پروگرام تا مون آ دننگ ءِ مون آ درسا آب اٹ تعلیم و پٹ وپول نا مسخت آتے دوئی کرسا کارآمد انسانی وسیلہ غاتا پیدوار اٹ ودکی ءِ پک کننگے ہراکہ بڑزکو تعلیی ادارہ غاتا نصب العین ءِ۔ اوپارے کہ جامعہ بلوچستان تینا کچ اٹنگا وسیلہ غاتیٹی مرسا طالب علم آتے بڑزکو تعلیم، پٹ وپولی سرجز آتا وارخواہی و گچین آخبت نا کنڈآن اتنگ اٹ اہم کڑد ادا کننگ ءِ۔ و صوبہ نا چندی علاقہ غاتیٹی تینا تعلیمی پروگرام تے ودفسا بڑزکو تعلیم نا دوئی کننگ ءِ ممکن کننگ کن گام گیج کننگ ءِ۔ انتئے کہ ہندا صدی شونداری نا صدی پاننگک ہموڑے تین تون چندی چیلنج و مشکل آتے اوار کرینے۔ و تعلیم ہمو ذریعہ ءِ ہراڑآن شونداری نا مزل آتے طے کننگ مریک و ساڑی صدی نا خواست آتیا پورو سلنگ مریک۔
