وزیراعظم عمران خان نادورہ سری لنکا نا ایسر آ اسیجائی اعلامیہ اس جاری

اسلام آباد۔ 24 فروری (اے پی پی) وزیراعظم عمران خان نا دورہ سری لنکا نا ایسر آ چارشنبے نادے آ اسیجائی اعلامیہ اس جاری کننگا۔ وزیراعظم عمران خان بنجائی وزیر، سینئر سرکاری کمامدارآتیا تالان بڑزکو کہولی ڈل اتون اوار سری لنکا نا صدر گوتابایاراجہ پاکسے نا سلہ غا سری لنکا نا اِرادے ئی دورہ ءِ کرے۔ وزارت عظمیٰ نا عہدہ ءِ سنبھالنگ آن پد وزیراعظم عمران خان نا دا سری لنکا نا اولیکو دورہ ئس۔ کولمبو آ بننگ آ وزیراعظم ءِ جم و جوش اٹ بخیر کننگا۔ اِرادے ئی اڈکننگ اٹ وزیراعظم عمران خان ڈل آتا کہول آ سری لنکا نا صدر گوتابایاراجہ پاکسے و وزیراعظم مہنداراجہ پاکسے اوڑدہی کریر۔ ہڑتوم آ ملک آک کمکاری نا چندی بشخ آتیٹی کثیر الجہتی تعلقداری تا سرجمی اٹ اول سرآن جاچ ءِ ہلکر۔ مذاکرات تین پہ تینی پت و شرف نا بنداو آ خوشگوار چاگڑد اٹ مس۔ کڑدہ غاک ساڑی ہی ٹی خارجہ سیکرٹری تا کہول انا ہڑتوم آ کنڈآتا سیاسی سلابت، اسیجائی اقتصادی کمیشن سیشن و کامرس سیکرٹری تا کہول آ گپ وتران ءِ مون آ دننگ، خڑکی و پدریسہ سلابت ءِ برجاتخنگ نا عزم انا درشانی ءِ کریر۔ کڑدہ غاک جامع وڑوڈول انا رداٹ کمکاری ءِ پین سوگو کننگ، پدریسہ اوڑدہی کننگ، بڑزکو کہول و ڈل آتا کہول آ ہن و بر ءِ مون آ دننگ، سلابت نا عمل ءِ مون آ دننگ و تعلقدار ادارہ غاتا نیام اٹ کمک کننگ آ امنا کریر۔ وزیراعظم عمران خان ‘‘پرامن ہمسائیگی’’ ویژن نا رداٹ سری لنکانا راجی و اقتصادی شونداری ٹی پاکستان نا کنڈآن کمکاری نا درشانی ءِ کرے۔ کڑدہ غاک دودوربیدگ رابطہ غاتے مون آ دننگ، انسانی وسیلہ غاتا شونداری، و چندی بشخ آتیٹی کاریم ناکچ ءِ ودفنگ تون اوار اوار تعلیمی و تکنیکی کمکاری نا ہم جاچ ءِ ہلکر۔ پاکستان پاک۔سری لناک ہائیر ایجوکیشن ءِ آپریشن پروگرام(پی ایس ایل ایچ ای سی پی) نا رداٹ طب (ایم بی بی ایس و بی ڈی ایس) نا بشخ اٹ 100 اسکالرشپ ناپڑوءِ کرے وخت اس کہ سری لنکا انسانی وسیلہ غاتا شون و لائخی تیٹی ودکی ٹی پاکستان نا کمک نا ستاءِکرے۔ بدھ آثار قدیمہ ناہند آتا بابت مذہبی سیل و سوات نا گیشتر وارخواہی و گندھارا تہذیب آن متکن و دودوربیدگی رشتہ غاتے محسوس کرسا کڑدہ غاک سیل و سوات نا بشخ اٹ کمکاری ءِ ودفنگ نا اہمیت آ زور شاغار و داٹی مہمانداری نا صںعت، بشمول تربیت و استعداد کاری ٹی ودکی تون اوار مہارت شیئر  کننگ نا فائدہ غاتے تالان کریر۔ پاکستان یونیورسٹی آف پیراڈینیہ کینڈی ٹی ایشین تہذیب و دودوربیدہ ئی مرکز نا جوڑ کننگ نا پڑوءِ کرے۔ ہڑتوم آ کڑدہ غاک الس تون السی رابطہ، سیل و سوات، واپار و دودوربیدگ ءِ مون آ دننگ کن فضائی رابطہ غاتے ودفنگ نا اہمیت ءِ امنا کریر۔ ہڑتوم آ ملک آتا نیام اٹ ہڑتوم آ کنڈآتا واپار و زرکاری ءِ ودفنگ کن پوسکن ءُ کسر پٹنگ کن، 24 فروری 2021ء آ اسہ بڑزکو کہولی پاک۔ سری لنکا کانفرنس اٹ ہڑتوم آ ملک آک تین پہ تینی است خواہی نا چندی بشخ آتیٹی اقتصادی تعلقداری تے سوگو کننگ وہڑتوم آ ملک آتانیام اٹ واپار وزرکاری نا اہمیت نا درشانی ءِ کریر۔ ہڑتوم آ ملک آک اسہ ارب امریکی ڈالر سالانہ ہڑتوم آ کنڈآتا واپاری کچ ہدف نادوئی کننگ نا اہمیت آزور شاغار وپاک۔ سری لنکا آجو واپاری معاہدہ ءِ گیشتر و گہراکننگ کن کاریم کننگ آ ہم امنا کریر۔ دادورہ ٹی ، پاکستان و سری لنکا نانیام اٹ سیل وسوات، زرکاری بورڈ، صنعتی ٹیکنالوجی انسٹی ٹیوٹ(آئی ٹی آئی)، جمہوری سوشلسٹ جمہوریہ سری لنکا و انٹرنیشنل سینٹر کیمیکل اینڈ بیولوجیکل سائنسز، صنعتی ٹیکنالوجی انسٹی ٹیوٹ آف سری لنکاو کامسیٹس یونیورسٹی اسلام آباد و یونیورسٹی آف کولمبو، سری لنکا و لاہور اسکول آف اکنامکس پاکستان نا نیام اٹ کمکاری نا بابت معاہدہ غاتیا دستخط مس۔ وزیراعظم عمران خان و وزیراعظم مہنداراجاپاکسے اسیجائی وڑاٹ سری لنکا پاکستان پارلیمانی فرینڈ شپ ایسوسی ایشن نا اول سرآن ٹہیفنگ نا اعتراف ءِکریر۔ کڑدہ غاک ہڑتوم آتا نیام اٹ پارلیمانی کمکءِ سوگو کننگ نا گرج آ زور شاغار۔ کڑدہ غاک دفاع نا بشخ اٹی ساڑی ہڑتوم آ کنڈآتا کمکاری آ است جمی نا درشانی ءِ کریر۔ وزیراعظم عمران خان 50 ملین ڈالر پوسکن آ دفاعی کریڈٹ لائن نا آسراتی نا ہم پڑو ءِ کریر۔ کڑدہ غاک سلامتی ، دہشت گردی، منظم ڈوہ و منشیات ومنشیات نااسمگلنگ آن بیدس انٹیلی جنس شیئرنگ نا بابت باندات آتیٹی اسہ ایلو تون کمک و ہم گرنچی کن سوگو شریداری نا گرج آ زور شاغار۔ وزیراعظم عمران خان گوازی تا سفارتکاری ءِ سوگو کننگ کن 24 فروری 2021 آ سری لنکانا اسپورٹس کمیونٹی تون اسہ دیوان اسے ٹی بشخ ہلک۔ دیوان اٹی پارلیمنٹ نا اسپیکر نا ساڑی گری ٹی سری لنکا نا وزیر گوازی و یوتھ نمل راجا پاکسہ ئسک ہم بشخ ہلکر۔ داوخت آ وزیر گوازی کولمبو ٹی ‘‘عمران خان ہائی پرفارمنس اسپورٹس سینٹر’’ اس جوڑ کننگ نا پڑو کرے۔ پاکستان سری لنکا ٹی گوازی تا مون آ دننگ کن 52 ملین روپئی فراوانی نا تینا فیصلہ نا پڑو ءِ کرے۔ کڑدہ غاک دودوربیدگ تنوع، پرامن بقائے تین پہ تینی و تین پہ تینی ہمدردی ءِ مون آدننگ کن بین المذاہب مکالمہ و ہم آہنگی نا اہمیت آ زور شاغار۔ کڑدہ غاک تین پہ تینی است خواہی نا امور آ علاقائی و جہانی کہول آ ہڑتوم آ ملک آتا نیام اٹ خڑکی کمک و داوڑنا باندات آتیا موبوط نقطہ نظر ءِ پین سوگو کننگ آ امنا کریر۔ کڑدہ غاک سارک انا اصول و مسخت آتون وابستگی نا درشانی ءِ کریر و سارک انا باسک ملک آتا ڈیہہ ٹی الس نا خیرخواہی کن ہم آہنگی ءِ مون آ دننگ نا گرج آ زور شاغار۔ کڑدہ غاک ڈیہہ ٹی شونہالی نا دوئی کننگ کن علاقائی کمکاری ءِ پین سوگو کننگ کن سارک انا عمل ءِ مون آ دننگ آ امنا کریر۔ علاقائی و جہانی چاگڑد اٹ مروک آ پیش رفت آ گپ وتران کرسا کڑدہ غاک علاقائی امن سلامتی و سوگوی کن تینا اسیجائی عزم انا درشانی ءِ کریر۔ وزیراعظم عمران خان علاقائی زرگزرانی نمو و شونہالی کن بی آرآئی نا اسہ اہم ءُ ڈٹ، سی پیک آن الس نا شونہالی کن اقتصادی و راجی فائدہ غاتے تالان کرے۔ سری لنکا ناوزیر اعظم حکومت و پاکستان نا الس نا سری لنکا نا آجوئی ، وتواجہی و علاقائی سالمیت نارکھ اکن آخبتی کمکاری آ منت واری ءِ ہرفے۔