پاکستان و سری لنکا مدام اسہ ایلو تون تفینو، وزیراعظم عمران خان نا سری لنکن صدر گوتابایاراجا پکسے تون اوڑدہی ٹی گپ وتران

کولمبو۔ 24 فروری (اے پی پی) وزیراعظم عمران خان پاکستان و سری لنکا نا نیام اٹ ہڑتوم آ کنڈآتا واپار، زرکاری و واپاری کمکاری ءِ مون آ دننگ نا کمک اٹ اقتصادی شریداری ءِ ودفنگ نا اہمیت آ زور شاغسا پارینے کہ پاکستان و سری لنکا مدام اسہ ایلو تون تفینو، پاکستان آخبت اٹ ہم سری لنکا نا پبی مخ تفی ءِ برجاتخک۔ داخیال آتا درشانی ءِ  او سری لنکا نا صدر گوتابایاراجا پکسے تون اوڑدہی ٹی گپ وتران کرسا کرے۔ ہڑتوم آ راہشون تا نیام اٹ کولمبو ٹی ایوان صدر اٹی ون آن ون اوڑدہی مس اوکان پد ڈل انا کہول آ ہم گپ وتران مس۔ وزیراعظم آفس نا میڈیا ونگ آن جاری بیان نا رداٹ دا اوڑدہی خوشگوار چاگڑد اٹ مس۔ وزیراعظم عمران خان پاکستان و سری لنکا نا نیام اٹ پت ہم آہنگی و تین پہ تینی کمکاری نا بنداو آ استوار تعلقداری تا اہمیت ءِ تالان کرے۔ وزیراعظم ہڑتوم آ کنڈآتا واپار زرکاری و واپاری کمکاری ءِ مون آ دننگ نا کمک اٹ اقتصادی شریداری ءِ ودفنگ نا اہمیت آزور شاغا۔ وزیراعظم پاکستان و سری لنکا نا نیام اٹ خاص وڑاٹ کشت وکشار، سیل و سوات، سائنس و ٹیکنالوجی،گوازی ، تعلیم و دودوربیدہ تون اوار چندی بشخ آتیٹی خڑکی کمکاری آ زور شاغا و نیزگاری نا چٹفنگ کن اسہ ایلو نا آزموندہ غاتیان فائدہ ہرفنگ نا اہمیت ءِ ہم بیان کرے۔ او آخبت اٹ ہم سری لنکا کن پاکستان نا پبی مخ تفی نا درشانی ءِ کرے۔ وزیراعظم عمران خان و سری لنکا نا صدر کثیر طرفہ فورم تیا خڑکی کمکاری ءِ برجاتخنگ نا عزم ظاہر کرے۔ ہڑتوم آ ملک آتا نیام اٹ خڑکی روایتی و دودوربیدگ تعلقداری تا ذکر ءِ کرسا وزیراعظم پارے کہ پاکستان اٹ سری لنکا نا الس کن مذہبی سیل و سوات نا بابت پرکشش ہند جوڑ کننگ نا کچ ساڑی ءِ و او خاص وڑ اٹ پاکستان اٹ وسیع بدھ دودوربیدہ ئی میرات ءِ تالان کرے۔ علاقائی رداٹ وزیراعظم امن، شونداری و رابطہ نا بابت تینا وژن نابارواٹ سری لنکا نا صدر ءِ معلومدار کرے۔ وزیراعظم سارک و بیلٹ اینڈ روڈ انیشی ایٹیو نا فلیگ شپ ڈٹ سی پیک نا کمک اٹ علاقائی شونہالی نا وارخواہی تون علاقہ ٹی کمکاری نا اہمیت آ ہم زور شاغا۔ وزیراعظم سری لنکا نا صدر گوتابایاراجاپکسے ءِ پاکستان نا دورہءِ کننگ نا سلہ ہم خلک۔