اسلام آباد۔ 24 فروری (اے پی پی) وزیراعظم عمران خان پارینے کہ ڈیہہ نا الس ءِ نیزگاری آن کشنگ کن واپاری تعلقداری تا مون آ دننگ المی ءِ، یورپی یونین نا وڑآ ننے ڈیہہ ٹی واپاری تعقلداری تے استورا کروئی مریک، ویل آتا ایسر جنگ انا جاگہ غا مذاکرات اٹی ءِ، پاکستان چین وامریکہ نا نیام اٹ ودوک آ خلیج اٹ مستین آنبار اسہ وار ولدا کڑد ادا کننگ کیک، سری لنکا نا بزنس کمیونٹی ءِ سی پیک اٹ زرکاری نا سلہ خلیوہ، پاکستان اٹ مذہبی ہند آتون اوار سیل و سوات نا بے پناہ وارخواہی ارے۔ داخیال آتا درشانی ءِ او چارشنبے نادے آ اولیکو پاکستان۔سری لنکاٹریڈ اینڈ انویسٹمنٹ کانفرنس آن تران کرسا کرے۔ داوخت آ سری لنکا نا وزیراعظم مہنداراجاپکسے ہم ساڑی ئس۔ وزیراعظم پارے کہ او نیزگاری نا چٹفنگ نا مسخت ءِ ہلسا سیاست اٹ بس، 25 سال مست او تینا جہد نا بناءِ کرے و کینسر ہسپتال نا بناءِ کرے انتئے کہ کینسر نا درمان بھاز کبین مننگ نا سوب آن لس بندغ نا وس آن پیشن ئس، آسودہی کاریم کرسا کنے احساس مس کہ پاکستان نا الس نا گیشتر نیزگاری، غذائی کاختی و افراط زر انا گواچی ءُ، پاکستان و سری لنکا ءِ اسہ وڑنا ویل آتا مون تروک ءِ۔اوپارے کہ سری لنکا نا صدر تون تدوک آدے چندی امور آ گپ وتران مس، المی آ گڑاتا نہاد آتیٹی کمتی نا بابت اوڑتون سیراٹ گپ وتران مس، ای چین نا دورہ ٹی داخناٹ کہ اوہول سیل و ریٹیل اٹ پرخ ءِ ٹیکنالوجی نا کمک اٹ کم کرے تانکہ لس بندغ ءِ آسراتی مرے۔ اوپارے کہ زرکاری نا کمک اٹ نن نیزگاری ٹی کمتی اتنگ کینہ۔ کاروبار ءِ آسان کننگ و برآمد آتے ودفنگ ننا اولیت ءِ۔ اوپارے کہ چین 35 سال اٹ 70 کروڑ مخلوق ءِ نیزگاری آن کشا، دابھلو سرسہبی اسے، کاروباری سرجز آتا مسخت دولت نا پیدوار و نیزگاری نا چٹفنگ ءِ، زرکاری نا وارخواہی ودی کرسا نن نیزگاری ءِ چٹفنگ کینہ۔ وزیراعظم پارے کہ سیاسی سوگوی و ہمسایہ غاتون گچین تعلقداری ہم نیزگاری ٹی کمتی نا ذریعہ ءِ۔ اوپارے کہ پاکستان و سری لنکا دہشت گردی نا مقابلہ ءِ کرینو۔ دہشت گردی زرکاری و سیل و سوات کن گڑتی اسے، ای اقتدار ءِ سنبھالنگ آن پد بھارت تون تعلقداری تے گچین کننگ و بے چیٹی تیٹی کمتی نا کوشست کریٹ و بھارتی وزیراعظم نریندر مودی ءِ ہیت وگپ نا سلہ خلکن ولے ننے سرسہبی رسینگتو۔اوپارے کہ ڈیہہ ٹی الس ءِ نیزگاری آن کشنگ کن واپاری تعلقداری المی ءِ، یورپی یونین نا وڑآ ننے ڈیہہ ٹی واپاری تعلقداری تے استوار کروئی مریک، جنگ انا جاگہ غا ویل آتا ایسری مذاکرات اٹی ءِ، پاکستان و بھارت نا نیام اٹ کشمیر نا جھیڑہ ساڑی ءِ ہرابیرہ ہیت وگپ اٹ ایسر مننگ کیک، چین جھیڑہ غاتیان پد ہم واپار نا مون آ دننگ اٹ سرسہبی دوئی کرینے، برصغیر اٹ ہم جھیڑہ غاتا ہیت وگپ و مذاکرات اٹ ایسر اس کشوئی مریک۔ اوپارے کہ پاکستان چین و امریکہ نا نیام اٹ ودوک آ خلیج اٹ کڑد ادا کننگ کیک، پاکستان مہالو ہم چین وامریکہ نا نیام اٹ بے چیٹی ءِ کم کرفنگ اٹ تینا کڑد ءِ ادا کریسس، نن ایلو قوم و انسانیت ءِ خڑک اتنگ خوانہ۔ وزیراعظم پارے کہ پاکستان و سری لنکا نا نیام اٹ سیل و سوات تون اوار چندی بشخ آتیٹی تعلقداری تے ودفنگ نا بھلو وارخواہی اس ارے۔ سری لنکا سیل و سوات نا بشخ اٹ بھاز شون ہلکونے، پاکستان سیل و سوات نا بشخ اٹ سری لنکا غان ہیل کننگ کیک، پاکستان اٹ بھاز انگا مذہبی ہند آک اریر و داگندھارا تہذیب و بدھ مت نا مرکز مسنے۔ نن پاکستان اٹ بدھ آتا مقدس و سیل و سواتی ہند آتے شون تسونن وآسراتی تیٹی ودکی کرینن، پاکستان سیل و سوات نا بابت زیباانگا ملکءِ، دنیا نا زیباانگا علاقہ و بڑزکو مشی آ چرجوئی پاکستان اٹی ءُ۔ اوسری لنکا نا زرکار آتیا زور شاغا کہ سی پیک اٹ زرکاری کیر۔ سری لنکا ءِ گوادر بندرگاہ نا کمک اٹ ازبکستان و نیامی ایشیائی ریاست آتسکان رسینگ میسر مریک۔ اوپارے کہ سری لنکا نا زرکارآک سی پیک اٹ خصوصی ، اقتصادی زون تیٹی زرکاری کیر۔ اوپارے کہ کنے کرکٹ نا بشخ اٹ سری لنکن ٹیم انا سرسہبی آ خوشیءِ سری لنکا و پاکستان نا نیام اٹ چندی گوازی تا کمکاری ءِ ودفنگ نا گرج ءِ۔ وزیر خارجہ شاہ محمود قریشی پارے کہ وزیراعظم عمران خان اقتدار ءِ سنبھالا تو غٹ اقتصادی ٹک آک خراب حالیت آتا ڈیک ءِ تسرہ۔ اوپارے کہ ہڑتوم آ ملک آتا نیام اٹ آجو واپار نا معاہدہ ساڑی ءِ، داسہ نن داناجاچ ءِ ہلینہ کہ داٹی پین اخس بشخ ءِ اوار کننگ کینہ۔ اوپارے کہ امن و شونداری نا مون آ دننگ ننا ایجنڈا ءِ۔ اوسری لنکانا کاروباری تپہ ءِ پاکستان آ بننگ نا سلہ خلک و پارے کہ او تینٹ بریر ہُریر کہ پاکستان اخس گچین مہمان نواز ءِ۔ سلاہکار واپار عبدالرزاق داؤد کانفرنس آن تران کرسا پارے کہ پاکستان سری لنکا ٹریڈ اینڈ انویسٹمنٹ کانفرنس نا اڈتننگ ستاکڑزک، نن ہڑتوم آ ملک آتا نیام اٹ واپار و زرکاری نا پوسکن آ وارخواہی تیان فائدہ ہرفنگ نا خواہندار اُن، نن سری لنکا تون اسہ پوسکن ءُ آخبت اسے نا بنداو ءِ تخنگ خوانہ، پاکستان و سری لنکا نا نیام اٹ واپار نا کچ ءِ پین ودفنگ نا گرج ءِ۔ داوخت آ سری لنکا ٹی پاکستان نا ہائی کمشنر میجر جنرل (ر) سعد خٹک پارے کہ پاکستان و سری لنکا نا نیام اٹ خڑکی تعلقداری اسہ وخت اسے آمحیط ءِ، ہڑتوم آ ملک آک بھاز انگا باندات آتیٹی اسہ ایلو تون تفینو، ہڑتوم آ ملک آتا نیام اٹ تعلقداری آن الس نا شونداری و شونہالی کن فائدہ ہرفنگ نا گرج ءِ۔ ہڑتوم آ ملک آتا نیام اٹ چندی بشخ آتیٹی اسیجائی کمکاری نا پوسکن ءُ وارخواہی پٹنگک و ہڑتوم آ کنڈآتا تعلقداری تے پین مون آ دننگک۔ سری لنکا نا وزیر واپار اجیت نیوات پارے کہ پاکستان و سری لنکا گڑاس تُو انا پرخ آن آجوئی دوئی کریر، وزیراعظم عمران خان ءِ نن کرکٹ گوازی کرسا خنانہ بھاز خوش مسونہ، و اینو اودے تین تون اوار مرسا ہم خوش اُن۔
