اسلام آباد۔ 15مارچ (اے پی پی) وزیر داخلہ چوہدری نثارعلی خان پارینے کہ سلہہ بند فوج ، پولیس ، سول آرمڈ فورس و قوم انا جیرت مند جہد و قربانی تیٹی پاکستان اٹی دہشت گردی ٹی ترندی اٹ کمتی مس۔ ملکی تاریخ اٹی اولیکو وار حکومت دہشت گردی نا لعنت نا برخلاف اسہ نیشنل ایکشن پلان اس پیش کرے۔ چارشنبے نا دے داڑے پاکستان و برطانیہ نا 2دے ئی جہانی سیمینار ہرانا سرحال ”سوگوی و امن کوشست آتا بابت آزموندہ غاتا تبادلہ“ ئس، نا کماشی ئِ کرسا اوپارے کہ جہانی برادری اسلام ئِ ہدف جوڑ کننگ نا رجحان نا حوصلہ شکنی ئِ کے و اسلام فوبیا آن پیش تمے۔ دنیا ٹی اسہ ارب 20 کروڑ مسلمان دہشت گردی نا لعنت آن غٹ آن زیات زہمی مس۔ اوپارے کہ جہانی برادری دیرینہ علاقائی ویل آتیان لاتعلق مننگ کپک۔ وزیر داخلہ پارے کہ ننے گدرینگوک آ کیہی عشرہ غاتیان علاقائی سلامتی نا ویل آتا مون تروکی ئِ، اوغانستان آ سوویت نا یلغار یا امریکی کارروائی آن پد انا حالیت آتیٹی پاکستان ئِ جہانی برادری تنیا ہلا۔ پاکستان فرنٹ لین سٹیٹ نا کڑد ئِ ادا کرے وخت اس کہ جہانی برادری زبانی جمع خڑچ اٹ کاریم ہلک۔ اوپارے کہ ہر جنگ ئِ کٹنگ کن پورو سیوت نا گرج مریک۔ سول و عسکری سروک آتا نیام اٹ گچین رابطہ و راج انا غٹ تپہ غاتا مخ تفی نا سوب گدرینگوک آ مسہ نیم سال اٹی پاکستان سرسہبی دوئی کرے۔اوپارے کہ بے پت و دوبہ خلنگ علاقائی امن نا نصب العین کن غیر مفید ئِ، گڑاس ملک آک ہر گڑا حتی کہ تینا نزوری تیا ہم پاکستان آ دوبہ خلکر۔ اوپارے کہ پاکستان نا تاریخ اٹی اولیکو وار حکومت دہشت گردی نا لعنت نا برخلاف اسہ قومی ایکشن پلان اس پیش کرے ، پاکستان آپریشن ضرب عضب اٹی بھلو سرسہبی دوئی کرے۔ جہانی ٹک آتا رداٹ پاکستان اٹی دہشت گردی نا گراف اٹی ترندی اٹ کمتی بس۔ ننے تینا کوشست آتے کن جہانی براری نا مخ تفی نا گرج ئِ۔ اوپارے کہ آپریشن ضرب عضب بناءکننگ آن مست حکومت مذاکرات نا غٹ آپشن تے کاریم اٹ ایس، مذاکراتی عمل نا نتیجہ غاک پورو تناظر و رائے عامہ ئِ بدل کریر۔ اوپارے کہ جہانی برادری جہد آجوئی و دہشت گردی نا نیام اٹ پرخ ئِ صفا کے۔ اوپارے کہ دین اسلام ئِ ہدف جوڑ کننگ و اودے دہشت گردی تون گنڈنگ بے کچ نامناسب و افسوزناک ئِ۔
