ملک اٹی شش میکو قومی خانہ مردم شماری نا اولیکو مرحلہ نا بناءمس ، مردم شماری نا عمل 25مئی اسکان اِرامرحلہ غاتیٹی پورو کننگک
اسلام آباد۔ 15مارچ (اے پی پی) پاکستان اٹی شش میکو قومی خانہ و مردم شماری نا اولیکو مرحلہ نا بناءمسنے، مردم شماری نا غٹ عمل 25مئی اسکان اِرا مرحلہ غاتیٹی پورو کننگک، اولیکو مرحلہ ٹی ملک انا 63ضلع غاتیٹی خانہ و مردم شماری نا عمل نا بناءکننگانے ہرا 15اپریل اسکان پورو کننگک وخت اس کہ ارٹ میکو مرحلہ نا بناء25اپریل آ مریک۔ اولیکو مرحلہ ٹی 63ضلع غاتیٹی مردم شماری مریک۔ اوفتے ٹی پنجاب نا 16، سندھ انا 8، خیبر پختونخوا نا 13، بلوچستان نا 15، آزاد جموں و کشمیر نا 5 و گلگت بلتستان نا 5ضلع غاتیان بیدس اورکزئی ایجنسی ہم اوار ئِ۔ ارٹ میکو مرحلہ ٹی مچ آ ملک انا 88ضلع غاتیٹی مردم شماری مریک، داٹی پنجاب و سندھ انا بیست ئُ یک بیست ئُ یک ضلع، خیبر پختونخوا نا 18، بلوچستان نا 17، آزاد کشمیر و گلگت بلتستان نا پنچ پنچ ضلع و بنجائی دارالحکومت اسلام آباد اٹی مردم و خانہ شماری نا عمل پورو کننگک۔ پاکستان اٹی 19 سال نا وقفہ آن پد مردم و خانہ شماری اڈتننگ انگ ئِ ۔ دا چرجوئی ٹی انتظامی و سیکورٹی نا پورو بست و بند کننگانے۔ مردم شماری ٹی اسہ لکھ ہژدہ ہزار آن زیات کارندہ بشخ ہلنگ ئُ۔ دا عمل اٹی پاک فوج انا کمکاری ہم دوئی ئِ و فوج انا کم و ود اِرا لکھ کارندہ بشخ ہلنگ ئُ۔ داوار مردم شماری ٹی خصوصی بندغ و خواجہ سرا تے ہم حساب کننگک، داکان بیدس مردم شماری فارم اٹی درملکی تا اندراج کن ہم خانہ اس جوڑ کننگانے۔ اوغان مہاجر آتا کارڈ تخوک آتا اندراج ئِ ہم درملکی تا خانہ ٹی کننگ انگ ئِ۔ صدر مملکت ممنون حسین چارشنبے نادے خانہ و مردم شماری نا باضابطہ بنائِ کرے۔ دا چرجوئی ٹی اوکراچی ٹی اسٹیٹ گیسٹ ہاﺅس آ خانہ شماری نا نمبر آ تینٹ خلک۔ چیف شماریات آصف باجوہ اٹک اٹی مردم شماری نا بنائِ کرے۔ داوخت آ او الس آن خواست کرے ساپارے کہ او مردم شماری کن بروک آ ٹیم انا باسک آتون پبی کمک کیر و بے خوف و خلیس درست معلومداری فراوان کیر۔ اوپارے کہ مردم شماری قومی ئُ فرض اسے، دا فرض انا پورو ی کن ننے تینا زمواری تے پورو ایمانداری و کسبی فرض اٹ پور و کروئی مریک۔ دا بابت بنجائی وزیرخزانہ سینیٹر اسحاق ڈار تینا اسہ بیان اسے ٹی پارینے کہ شفاف مردم شماری ئِ غٹ تعلقدار ادارہ غاتا کمک و مخ تفی آن ہی سرسہب جوڑ کننگ مریک۔ حساب وکتاب نا مصدقہ مننگ ئِ المی جوڑ کننگ کن خاہوت آتا سروک یا زموار بندغ نا قومی شناختی کارڈ المی ئِ ولے اگہ خاہوت نا بندغ تون قومی شناختی کارڈ اف تو او تینا شناخت نا تصدیق کن پین دستاویز پیش کننگ کیک۔
