حوال: شفیق الرحمان
مٹ و بدل: سعادت خان ایم حسنی
خیبر پختونخوا نا لکھ آ مخلوق خاص وڑاٹ نیزگار، نادارو محروم تپہ غاتیکن درمان نا مفت آسراتی اسہ نمعت اس پک مسنے۔ کیہی دہائی تیان صوبہ نا نیزگار الس درمان نا بھلا خڑچ آتیٹی اختہ ئسر و اوفتا گیشتری جوان ءُ درمان اسے آن محروم ئسرہ۔ جان جوڑی انصاف کارڈ آن نئے بیرہ اوفتے درمان نا آب اٹ آسراتی دُوبریک بلکن مشکل اٹ اُراناخڑچہ ءِ پورو کروک آتیا داسہ مالی زور ہم کم مریک، راج انا نادار تپہ کن حالیت آک ہمووخت آ است ہسون مریرہ ہراتم اوفتے درمان و اِرغ آن اسہ گڑاسے گچین کروئی تمے۔ داحالیت آتیٹی اوفک درمان نا جاگہ غا چناتا پڈ ءِ اولیت ایترہ و درمان کن اوفک بھلو سود اسے آ وام ہلنگ آ بیوس مریرہ۔ مالی مشکل آتا سوب آن اوفک تڑہ ئی آتا گواچی مریرہ ہرانا سوب آن اوفتا مرض گڑاس لاعلاج دروشم اس اختیار کیرہ، دابابت خیبرپختونخوا نا وزیر خزانہ و جان جوڑی تیمور سلیم جھگڑا پارے کہ خیبرپختونخوا ملک انا اولیکو صوبہ جوڑ مسنے ہراڑے اونا غٹ باتی تے مفت درمان نا آسراتی فراوان کننگانے۔
وزیراعظم عمران خان نا ’’جان جوڑی نا آسراتی غٹ اکن‘‘ نا وژن نا رداٹ صوبہ نا سد درسد آبادی ءِ ریکارڈ مسہ تُو انا تہہ ٹی داآسراتی ءِ تننگا۔ اوپارے کہ مفت درمان آن بیدس صوبہ نا 280 ہسپتال آتیٹی اینٹی کورونا ویکسینیشن سینٹر جوڑ کننگانے۔ بنائی وڑاٹ بنجانا کنڈآن صوبہ ءِ 16 ہزار ویکسین خور رسینگاسس ہراکرونا نا برخلاف مون نا پڑآ جنگ تروک آ محکمہ جان جوڑی نا عملہ ءِ خلنگانے، اوپارے کہ اینٹی کورونا ویکسین کن دونیم ہزار عملہ نا تربیت ءِ کننگانے و 64 ہزار آن زیات ورکرناجوڑ آتے ویکسین تننگ کن مہالو آن رجسٹرڈ مسنو، اوپارے کہ خیبرپختونخوا پاکستان نا اولیکو صوبہ ءِ ہراڑے پی ٹی آئی نا منشور نا یونیورسل ہیلتھ کوریج(یو ایچ سی) نا رداٹ غٹ مخلوق ءِ جان جوڑی پلس کارڈ (ایس پی سی) تننگانے۔ چترال آن ڈی آئی خان غٹ ضلع غاک یو ایچ سی ٹی و چارسد آن زیات سرکاری و نجی ہسپتال ایس پی سی پروگرام نا لسٹ اٹ اوار ءُ۔ صوبہ نا ہفت سویلی ضلع غاتیٹی ایس پی سی نا مسٹ میکو و فائنل راؤنڈ پورو مننگ آن پد ہندا بڑزکو ہسپتال آتیٹی درمان نا مفت آسراتی نا فراوانی بناکرینے۔
ایس پی سی نا رداٹ ہرحقدار خاہوت اسہ سال اٹ دہ لکھ اسکان مفت درمان نا آسراتی آن فائدہ ہرفنگ کیک و داپروگرام آن چارکروڑ باتی فائدہ ہرفنگ کیرہ۔ سویلی ضلع غاتیٹی جان جوڑی کارڈ پلس پروگرام نا بناءِ کننگ آن مہالو دا ڈٹ مالاکنڈ، ہزارہ و پشاور زون اٹی بناکننگاسس۔ پشاور نا 28 ہسپتال بشمول خیبرٹیچنگ ہسپتال، حیات آبادمیڈیکل کمپلیکس، لیڈی ریڈنگ ہسپتال، ارنم پشاور انسٹیٹیوٹ آف کارڈیا لوجی، نصیراللہ بابر ٹیچنگ ہسپتال، رحمان میڈیکل انسٹیٹیوٹ، نارتھ ویسٹ ٹیچنگ ہسپتال، جناح ٹیچنگ ہسپتال، فوجی فاؤنڈیشن ہسپتال و انسٹیٹیوٹ آف کڈنی ڈیزیز، دا پینل اٹ اوار ءُ۔
لیڈی ریڈنگ ہسپتال نا ترجمان محمد عاصم پارے کہ ایس پی سی نا رداٹ سرکاری بشخ انا ہسپتال اٹی مفت درمان نا آسراتی تا بناءِ کننگانے ہراڑے ناجوڑ آتا آسراتی کن خصوصی ’’ایس پی سی کاؤنٹرز‘‘ جوڑ کننگانے۔
اوپارے کہ ایس پی سی نا رداٹ است انا مرض انا ناجوڑ آتے مفت سٹنٹ تننگ انگ ءِ ہراڑکن مستین اٹ مسٹ آن پنچ لکھ روپئی اسکان ادا کروئی تماکہ، داوخت آ ایل آر ایچ اٹ است انا مرض انا چِل ناجوڑ داخل ءُ ہرافتیان کیہی اسٹ ءِ سٹنٹ خلنگانے۔ سرجم حوال آتارداٹ چترال نا شش ہسپتال، دیر اپرنا اِرٹ، لوئردیر نا ہشت، مالاکنڈنا ہفت، سوات نا 14، بٹگرام نا پنچ، مانسہرہ نا مسٹ، ایبٹ آباد نا دہ، بونیر و ہری پور نا اسہ اسہ، صوابی نا 14، مردان نا 13، نوشہرہ نا 8، چارسدہ نا پنچ، کوہاٹ نا اِرٹ، ہنگو نا پنچ، بنوں نا شش، لکی مروت نا چار، ڈی آئی خان نا شش ہسپتال تے پینل آ شاغنگانے۔
قبائلی ضلع مہمند نا اسہ بیمارپرس محمد اے پی پی ءِ پارے کہ اونا لمہ ءِ لیڈی ریڈنگ ہسپتال نا کورونا وارڈ اٹ داخل کننگا ہراڑے اودے پنچ ہزار روپئی مالیت نا دوائی مفت تننگا۔
داکان مست دا خڑچ آتے ننے تینا جیب آن کروئی تماکہ ولے داسہ ایس پی سی نا رداٹ ننا درمان ءِ مفت کننگ انگ ءِ۔ اوپارے کہ عمران خان و صوبائی حکومت نا منت وار، ہرافک نیزگار آتا ڈکھیائی ءِ پہہ مرسا مفت درمان نا آسراتی فراوان کریر، اسہ پین بیمار پرس قیصر ندیم پارے کہ اونا ایڑھ سالم ایل آر ایچ اٹ داخل مسوسس واودے مفت درمان نا آسراتی تننگا، داصوبہ نا الس کن اسہ بھاز بھلو ٹیکی اسے۔ پروگرام ءِ سرسہبی اٹ چلیفنگ کن خیبرپختونخوا حکومت 2020-21ء نا بجٹ اٹ 18 ارب روپئی جتا کرینے تانکہ صوبہ نا لکھ آ مخلوق ءِ مفت درمان نا آسراتی تننگ اٹ فریشانی مف۔ داپروگرام آن ہمو غٹ مخلوق فائدہ ہرفنگ کیرہ ہرافتا کمپیوٹرائزڈ شناختی کارڈ اٹ آخبتی ڈس و نشان داجاگہ نا مرے۔ نوشہرہ نا کینسر نا اسہ ناجوڑ خورشید خان پارے کہ کینسر نا تشخیص مننگ آن پد ہراتکلیف آن ای گدرینگانٹ اودے کس اس محسوس کننگ کپک، دامرض انا درمان کن ای تینا غٹ مچ کروک آ پیسہ غاتے خڑچ کریٹ۔
اوپارے کہ داسہ ای بھاز زیات خوش اُٹ انتئے کہ ہیلتھ پلس کارڈ انا رداٹ داسہ کنکون آ ناجوڑ آتے درمان نا مفت آسراتی رسینگانے۔ اوپارے کہ کینسر نا ناجوڑاکن صوبائی حکومت نا کنڈآن دہ لکھ روپئی اسکان درمان نا فراوانی بھاز بھلو ہیت اسے، داڑکن ای کنکون آ ناجوڑ عمران خان و صوبائی حکومت نا منت واراُن۔ کینسر آن بیدس کڈنی ٹرانسپلانٹ، است انا مرض و ایلو دائمی ناجوڑآتے مفت درمان نا آسراتی تننگ انگ ءِ۔
دانا بھاز زیات گرج ئس ولے مستین نا حکومت آک کیہی عشرہ اسکان داوڑ کتوس۔ ولے داپی ٹی آئی نا حکومت نا طرہ امتیاز ءِ کہ او صوبہ نا لکھ آ مخلوق نا مشکل آتے مُر کننگ کن دا بھاز جوان ءُ گام اس ہرفینے۔
