اسلام آباد۔ 19 فروری (اے پی پی) وزیر خارجہ مخدوم شاہ محمود قریشی پارینے کہ پاکستان، اوغانستان نا امن وسوگوی و شونداری و شونہالی کن تینا کڑد ءِ ادا کننگ کن سنبرینگوک ءِ، پاکستان اوغانستان نا شونداری و شونہالی نا بابت چندی ڈٹ آتیکن اسہ ارب امریکی ڈالر نا بھکلو زراس جتا کرے۔ داہیت ءِ او اوغانستان نا مسعود فاؤنڈیشن نا چیئرمین احمد ولی مسعود تون گپ وتران کرسا پارے ہرا جمعہ نادے آ وزارت خارجہ ٹی اوڑتون اوڑدہی کرے۔ ترجمان دفترخارجہ نا رداٹ اوڑدہی ٹی اوغان امن عمل تون اوار تین پہ تینی است خواہی نا باندات آگپ وتران کننگا۔ وزیر خارجہ پارے کہ پاکستان، اوغانستان اٹ امن نا غٹ آن زیات خواہندار ءِ۔ ہنداخاطرآن پاکستان، اوغان امن اٹ خلوص نیت اتون خیرخواہی کوشست آتے برجاتخانے۔ پاکستان نا خیرخواہی کوشست آتیٹی امریکہ و طالبان تا نیام اٹ مذاکرات سرسہبی اٹ ہمکنار مس و امن معاہدہ طے مس۔ وزیر خارجہ پارے کہ نن سمجھنہ کہ اوغانستان اٹ امن مچ آ ڈیہہ کن المی ءِ۔ بین الاوغان مذاکرات نا اڈتننگ، اوغانستان نا ویل انا جامع و آخبت سیاسی ایسری کن بھاز اہم ءُ موقع اسے۔ شاہ محمود قریشی پارے کہ اوغانستان اٹی پرتشدد واقعہ غاتیٹی ودکی گڑتی اسے۔ اوغانستان اٹی پرتشدد واقعہ غاتیٹی کمتی اتنگ و ساڑی آ جنگ بندی کن غٹ کڑدہ غاتے سنجیدہ کوشست کننگ نا گرج ءِ۔ شاہ محمود قریشی پارے کہ گڑاس پیشن نا واکدار اوغان امن عمل ءِ بے سہب کننگ کن متحرک ءُ دا زموار آتیا سخت نظر تخنگ نا گرج ءِ۔
