اسلام آباد۔ 15مارچ (اے پی پی) چین پاکستان اقتصادی راہداری ڈٹ انا پوروی آن پاکستان نا جم اٹنگا قومی پیداوار (جی ڈی پی ) نا شرح نمو 15 درسد اسکان ودک۔ سی پیک نا پوروی و آپریشنل مننگ آن پد نئے بیرہ چین اتون پاکستان نا اقتصادی و دودوربیدہ ہی رابطہ غاتیٹی ودکی مریک بلکن ڈیہہ نا ایلو ملک آتون اوار مچ آ دنیا نا ملک آتون پاکستان نا تین پہ تینی رابطہ و ہڑتوم آ کنڈآتا واپار اٹی نمان ودکی مریک ہراڑآن جی ڈی پی نا سالانہ شرح نمو 15 درسد اسکان ودنگ نا اومیت ارے۔ انسٹیٹیوٹ آف چارٹر اکاﺅنٹس آف پاکستان (آئی سی اے پی پ) نا کنڈآن اڈ تروک آ سی ایف او کانفرنس 2017 ءآن تران کرسا اقتصادی چاہندار آک پاریر کہ چین پاکستان اقتصادی راہداری نابھلا ڈٹ پاکستان کن گیم چینجر جوڑ مریک و دانا پوروی آن بے روزگاری نا چٹنگ ، اقتصادی شونہالی و معیشت نا چندی بشخ آتیٹی پوسکن ئُ وارخواہی ودی کننگ اٹی کمک رسینگک۔ اوپارے کہ سی پیک نا پوروی آن ملکی معیشت نا شونداری نا کچ اٹی نمان ودکی مریک ہرانا زئمک نئے بیرہ پاکستان بلکن ڈیہہ نا ایلو ملک آتا معیشت آتیا تمک و ڈیہہ نا شونداری و شونہالی ٹی کمک رسینگک۔
