کراچی، لاہور ، فیصل آباد ، پشاور و کوئٹہ تون اوار ملک انا چندی بشخ آتیٹی شش میکو مردم شماری نا اولیکومسہ دے ئی مرحلہ نابناء

اسلام آباد۔ 15مارچ (اے پی پی) کراچی، لاہور ، فیصل آباد ، پشاور و کوئٹہ تون اوار ملک انا چندی بشخ آتیٹی شش میکو مردم شماری نا اولیکو مسہ دے ئی مرحلہ نا بناءکننگا۔ پی ٹی وی نا رداٹ چارشنبے نا سہب مچ آ ملک اٹی مروک آ شش میکو مردم شماری نا اولیکو مسہ دے ئی مرحلہ نا بناءکننگا۔ کراچی ، لاہور، فیصل آباد، پشاور و کوئٹہ تون اوار ملک انا چندی بشخ آتیٹی کننگا۔ آئین نا رداٹ ہر دہ سال پد شماری کانودی گرج اسے ولے پاکستان اٹی دا عمل 19 سال پد مننگ ئِ۔ دا ڈیہہ ٹی اولیکو مردم شماری حکومت برطانیہ 1881ءٹی کرفے ولے پاکستان نا معرض وجود اٹی بننگ آن پد ، 1951، 1961، 1972، 1981و 1998 ٹی مردم شماری مس ۔ داسہ سپریم کورٹ انا حاکم آ بناءکروک آ مردم شماری پاکستان نا تاریخ اٹی اولیکو وار اِرا مرحلہ غاتیٹی کننگ انگ ئِ۔ اولیکو مرحلہ ٹی اولیکو مسہ دے اٹی 15آن 17 مارچ اسکان اُراتا حساب کننگ نا کاریم ئِ پورو کننگک۔ 18 آن 27مارچ اسکان مردم شماری نا عملہ اُرا اُرا غا ہنسا مردم شماری نا ڈیٹا ئِ یکجا کیک۔ 28 مارچ آ ہندن انگا بندغ آتا مردم شماری مریک ہرااُراتے ٹی رہینگپسہ۔ اولیکو مرحلہ ٹی پنجاب نا 16ضلع غاتیٹی مردم شماری ناکاریم مریک۔ سندھ اٹی کراچی نا غربی، سویلی ، شرقی ، نیامی، کورنگی و ملیر تون اوار حیدرآباد و گھوٹکی تون اوار 8 ضلع غاتیٹی مردم شماری مریک۔ وخت اس کہ خیبر پختونخوا ٹی پشاور تون وار 13ضلع و اورکزئی ایجنسی ٹی مردم شماری کننگ انگ ئِ۔ بلوچستان اٹی کوئٹہ تون اوار 15ضلع غاتیٹی مردم شماری کننگ انگ ئِ۔ آزاد کشمیر و گلگت بلتستان نا 5 پنچ ضلع غاتیٹی اولیکو مرحلہ ٹی مردم شماری کننگک۔ اولیکو مرحلہ نا مردم شماری و خانہ شماری 13اپریل آ پورو مریک اوکان پد ملک انا ایلو بشخ آتیٹی ارٹ میکو مرحلہ 25اپریل آن بناءکرسا 24مئی آ چٹک۔ مردم شماری نا پرامن اڈ تننگ کن 2لکھ فوجی کارندہ تعینات کننگانے۔