اسلام آباد۔ 15مارچ (اے پی پی) انڈونیشیا نا پارلیمانی ڈل چارشنبے نا دے داڑے وزیراعظم نا خصوصی کمکار امور خارجہ سید طارق فاطمی ون اوڑدہی کرے، ڈل انا سروکی ئِ مادام دیوی کوریاتی کریکہ۔ اوڑدہی ٹی ہڑتوم آ ملک آتا نیام اٹ چندی بشخ آتیٹی کمکاری نا جاچ ئِ ہلنگا۔ خصوصی کمکار ہڑتوم آ ملک آتا نیام اٹ پارلیمانی کہول آ درشان آتیا است جمی نا درشانی ئِ کریر و ایشیائی پارلیمنٹ نااڈ تننگ کن انڈونیشیا نا مخ تفی نا ستائِ کرے۔ اوڈل ئِ دہشت گردی نا چٹفنگ کن پاکستان نا کوشست و دا چرجوئی ٹی نمان سرسہبی تیان معلومدار کرے۔ اوپارے کہ دا کوشست آتا سوب نئے بیرہ پاکستان پین پرامن و سوگو مسنے بلکن معیشت نا سوگوی و درملکی زرکار آتے کن پاکستان ئِ اسہ مثالی ہند اس جوڑ کننگ کن حالیت آک سازگار مسنو۔
