راولپنڈی۔ 15مارچ (اے پی پی) سلہہ بند فوج و کانود نافذ کروک آ ادارہ غاتیا جلہو آتون اوار دہشت گردی نا سنگین ڈوہ تیٹی اوار مسہ دہشت گرد آتے ساہیوال نا جیل اٹی پاہو تننگا، ڈوہدار تیا فوجی عدالت آتیٹی مقدمہ چلیفنگا۔ پاک فوج انا شعبہ تعلقات عامہ (آئی ایس پی آر) نا کنڈآن چارشنبے نا دے داڑے جاری بیان نا رداٹ ہراڈوہدار تے پاہو نا سزا تننگا اوفتے ٹی سید زمان خان ولد سید نواص خان، شاہ ولی ولد گل خان و محمد ذیشان ولد عبدالقیوم خان اوار ئُ۔ سید زمان خان حرکت الجہاد اسلامی نا اسہ سرگرم ئُ کارندہ اس ئس و او سلہہ بند فوج آتیا جلہو اٹی اوار ئس ہراڑآن فوجی شہید و ٹھپی مسر و سرکاری ماڑی تے نسخان رسینگا، ڈوہدار مجسٹریٹ و ٹرائل کورٹ نا مون آ تینا ڈوہ ئِ منا و اودے سزائے موت تننگا۔ شاہ ولی تحریک طالبان پاکستان نا سرگرم ئُ کارندہ اس ئس، او کانود نافذ کروک آ ادارہ و سلہہ بند فوج آ جلہو آتیٹی اوار ئس ہراڑآن فوجی شہید و ٹھپی مسر، او مجسٹریٹ و ٹرائل کورٹ انا مون آ تینا ڈوہ تے منا، اودے سزائے موت تننگا۔ محمد ذیشان حرکت الجہاد اسلامی نا سرگرم ئُ کارندہ اس ئس او سلہہ بند فوج آ جلہو اٹی اوار ئس ہراٹی فوجی شہید و ٹھپی مسر و او مجسٹریٹ و ٹرائل کورٹ انا مون آ تینا ڈوہ انا ارتکاب ئِ کرے و اودے سزائے موت تننگا۔ فوجی عدالت آتا کنڈآن سزائے موت بنفوک آ 161ڈوہدار تیان 21 ئِ پاہو تننگانے۔
