بی آئی ایس پی نیاڑی تے بااختیار جوڑ کننگ نا بھلو پلیٹ فارم اسے، وزیراعظم محمد نواز شریف نیزگار و نادار نیاڑی تا کمک کن پروگرام نا دنگ ئِ ودفینے
اسلام آباد۔ 15مارچ (اے پی پی) بے نظیر انکم سپورٹ پروگرام (بی آئی ایس پی ) نا چیئرپرسن ماروی میمن پارینے کہ بی آئی ایس پی نیاڑی تے بااختیار جوڑ کننگ اٹی بھلو پلیٹ فارم اسے ، وزیراعظم محمد نواز شریف نیزگار و نادار نیاڑی تا کمک کن بے نظیر انکم سپورٹ پروگرام نا دنگ ئِ ودفینے، سرسہب نیاڑی تا زمواری ئِ کہ او راج اٹی سیاسی و مالی وڑاٹ نزور نیاڑی تا اوار درسا کار۔ داخیال آتا درشانی ئِ او چارشنبے آ داڑے ویمن کاکس نا کنڈآن نیاڑی تا مسہ دے ئی جہانی کانفرنس آن تران کرسا کرے۔ داوخت آ ایم این اے ڈاکٹر فوزیہ حمید، میانمر، اردن و ایلو ملک آتا ڈل آتون اوار پارلیمنٹ نا باسک و ہندی حکومت آتا نمائندہ غاک ہم ساڑی ئسر۔ ماروی میمن جہانی کانفرنس اٹی ساڑی غٹ جہانی و ملکی ڈل آتے ببو خیرٹ پارے۔ اوپارے کہ کانفرنس اٹی ساڑی ہندی حکومت آتا نمائندہ غاتا ساڑی گری ستاکڑزک۔ ماروی میمن پارے کہ نیاڑیک جتا وڑنا ویل آتا گواچی ئُ ہرافتے ٹی بیدادی، تعصب و راجی ویل آک اوار ئُ۔ اوپارے کہ پاکستان اٹی نیاڑی تے بااختیار جوڑ کننگ کن کانود سازی کننگانے۔ نیاڑی تے اُرائی بیدادی آن رکھ ملانے۔ اوپارے کہ اجتماعی وڑاٹ کاریم کروک آ نیاڑیک بھلو مسخت دوئی کننگ اٹی سرسہب مریرہ۔ اوپارے کہ بے نظیر انکم سپورٹ پروگرام پارلیمنٹ نا ایکٹ نا رداٹ جوڑ مسنے، وزیراعظم محمد نواز شریف ملک اٹی نادار و نیزگار نیاڑی تا کمک کن اونا دنگ ئِ ودفینے۔ ملک اٹی 54لکھ نیاڑی دا پروگرام آن فائدہ ہرفنگ ئُ۔ ماروی میمن پارے کہ بے نظیر انکم سپورٹ پروگرام نیاڑی تے بااختیار جوڑ کننگ کن بھلو پلیٹ فارم اسے ، دا پروگرام آن فائدہ ہرفوک آ سرسہب نیاڑی تا دا زمواری ئِ کہ او نیزگار زہمی نیاڑی تے اوار درسا کار و اوفتے مون آ دننگ کن کمک کیر۔ کانفرنس ٹی میانمر و اردن نا ڈل آک تینا ملک انا نمائندگی ئِ کرسا نیاڑی تا کڑد انا بارواٹی معلومدار کریر۔
