اسلام آباد۔ 14مارچ (اے پی پی) اسپیکر قومی اسمبلی سردار ایاز صادق پارینے کہ پاکستان ڈیہہ و دنیا ٹی امن و شونہالی نا مون آ دننگ کن پرعزم ءِ، ننے دہشت گردی ، انتہاپسندی، نیزگاری نا چٹفنگ، موسمیاتی بدلی نا زئم تے کم کننگ و انسانی حق و جہانی اقتصادی شونداری نا اسیجائی چیلنج آتون مون تننگ کن اواری اٹ کاریم کروئی مریک۔ اگہ جمہوریت پسماندہ تپہ و خاص کر نیاڑی و چنا و اقلیت آتا حق انا رکھ ءِ کننگ کتو تو او حقی نمائندگی نا داوا ءِ کننگ کپک، ایشیائی پارلیمانی اسمبلی نا باسک ملک آتے اقوام متحدہ نا قرارداد آتا روشنی و الس نا خواہش آتا رداٹ غٹ ایسر نا چاری ویل آتا پرامن ایسری کن بایدے نیام تمے، سی پیک آن نئے بیرہ پاکستان و چین فائدہ ہرفرہ بلکن اونا ایران، اوغانستان ، بھارت ، نیامی ایشیا و مچ آ ڈیہہ آ مثبت زئم تمک۔ سے شنبے نا دے داڑے ایشیائی پارلیمنٹ نا اڈتننگ کن کمیٹی نا دیوان نا بنائی سیشن آن تران کرسا اسپیکر قومی اسمبلی پارے کہ ایشیائی پارلیمانی اسمبلی انسانی حق انا رکھ و جمہوریت ءِ سوگو جوڑ کننگ نا بابت علاقائی کمک نا مون آ دننگ کن اسہ سوگو ءُ فریم ورک اس مہیا کننگ کیک، ایشیائی ڈیہہ راجی و اقتصادی ، دودوربیدہ ہی ، جغرافیائی و شونداری پلوآتیان مالامال ءِ ۔ ساڑی آ عشرہ غاتیٹی گچین واپاری پالیسی ، گڑا تا گچین ہن و بر و پیداوار اٹی ودکی ایشیاءِ بدل کرینے تخانے ولے انتہاپسندی و بین الملکی دہشت گردی و علاقائی جھیڑہ غاتون اوار گڑاس بھلو اڑاند ارے، فلسطین ، شام ، عراق ، جموں و کشمیر و اوغانستان کون آ معاملہ غاک علاقائی امن و ہم آہنگی کن پدریسہ خلیس ءُ۔ اوپارے کہ نن تینے مون تروک خلیس آتے گوجالنگ کپنہ و دا چیلنج آتون پہلو تہی کننگ مفک۔ ایشیا اینو دنیا نا غٹ آن ویل آتا گواچی ڈیہہ ءِ، دے ٹکی نیامی نا تنکی آن داعش نا وجود اٹی بننگ و سویلی دے ٹکی ایشیاٹی دشمنی ننکن چیلنج ءُ ولے نن بایدے داہیت ءِ گیرام کپن کہ جمہوریت آک اسہ ایلو تون جنگ کپسہ۔ اوپارے کہ اگہ جمہوریت پسماندہ تپہ و خاص کر نیاڑی و چناو اقلیت آتا حق انا رکھ ءِ کننگ کتو تو او حقی نمائندگی نا داوا ءِ کننگ کپک۔
