اسلام آباد۔ 14مارچ (اے پی پی) وزیر مملکت دیر و بجلی عابد شیرعلی پارینے کہ حسین حقانی نا معاملہ گا عدالتی یا پارلیمانی کمیشن اس اڈتننگے و اودے انٹرپول نا کمک اٹ پدی اتنگے۔ پیپلزپارٹی دُن انگا بندغ ئِ تینا دور اٹی امریکہ ٹی سفیر انت اکن خلک۔ فوجی عدالت آتا اڈتننگ دہشت گردی نا چٹفنگ کن المی ئِ۔ سے شنبے نا دے پارلیمنٹ ہاﺅس نا پیشن میڈیا تون ہیت وگپ کرسا اوپارے کہ حسین حقانی نا بابت پیپلزپارٹی نا کنڈآن بیرہ پڑو لاتعلقی بس اف او پی پی پی نا حکومت اٹی امریکہ کون آ اہم ملک اٹی پاکستان نا سفیر مسنے اونا انکشاف آتیان پد بلاول بھٹو یا آصف علی زرداری نا ئِ بایدے ورندی تروئی مرے اوفتا بیان آن جہانی کہول آ پاکستان نا امیج خراب مس۔ اوپارے کہ مسکوہی حکومت نا دوراٹی میمو گیٹ سکینڈل مون آ بس ہراڑآ محمد نواز شریف سپریم کورٹ آ ہنا۔ دا معاملہ غا عدالتی یا پارلیمانی کمیشن اس اڈتننگے و حسین حقانی ئِ انٹرپول نا کمک اٹ پدی وطن آ اتسا مقدمہ چلیفنگے۔ وزیر مملکت پارے کہ پیپلزپارٹی ئِ حسین حقانی نا بابت وضاحت کروئی مرے کہ دُن انگا بندغ ئِ امریکہ ٹی سفیر انت اکن خلک۔ اسہ سوج اسے نا ورندی ٹی اوپارے کہ ملکی سالمیت کن و دہشت گردی نا چٹفنگ کن فوجی عدالت آتا اڈتننگ المی ئِ دا عدالت آتا اڈتننگ نامسخت دہشت گرد و اوفتا کمکار آتے چٹفوئی ئِ۔ اوپارے کہ فوجی عدالت آتا مخالفت کروک آک ملک آن دہشت گردی و اوفتا کمکار آتا چٹفنگ ئِ خواپک۔
