کوئٹہ۔ 13مارچ (اے پی پی) بلوچستان اسمبلی نا دیوان دوشنبے نا دے اسپیکر راحیلہ حمید خان درانی نا کماشی ٹی مس۔ دیوان امنائی قرارداد نا منظوری ءِ تس ہراٹی پاننگانے کہ ملک اٹی مروک آ بروک آ مردم شماری ٹی خصوصی بندغ آتا اندراج ءِ المی جوڑ کننگے۔ قرارداد ءِ باسک صوبائی اسمبلی پرنس احمد علی پیش کرے۔ قرارداد ءِ امنائی وڑاٹ منظور کننگا، قرارداد اٹی پاننگاکہ مردم شماری ٹی خصوصی بندغ آتا اندراج ءِ المی جوڑ کننگے تانکہ خصوصی بندغ آتیٹی خننگوک آ بے چینی مر مرے۔ دیوان اٹی جان جوڑی و شرحالی نا قائمہ کمیٹی نا چیئرپرسن ڈاکٹر رقیہ ہاشمی چلڈرن ہسپتال کوئٹہ نا بابت رپورٹ اس پیش کرے۔ دیوان اٹی صوبائی وزیر عبدالرحیم زیارتوال کیڈٹ کالج مستونگ و پشین اٹی اسٹاف نا تعیناتی نا بابت رپورٹ اس ہم ایوان اٹی پیش کرے۔ دیوان اٹی دولت مشترکہ نا جہانی دے انا وخت آ شرہ مس۔ اسپیکر دولت مشترکہ نا جہانی دے انا وخت آ 2017ء نا منشور و کلہو ءِ خوانسا بنفے ، دولت مشترکہ نا دے انا بابت اسمبلی نا باسک آک پاریر کہ تنظیم نا باسک ملک آتیٹی امن جمہوریت و کانود نا بالادستی ءِ المی جوڑ کننگے۔ دولت مشترکہ نا مفاد آتا جہانی کہول آ رکھ و دہشت گردی نا چٹفنگ کن کامن و ہیلتھ بایدی پبی کوشست کیر۔ اسمبلی نا باسک آک دولت مشترکہ نا جہانی دے انا وخت آ تینا تران اٹی پاریر کہ دولت مشترکہ دنیا ٹی امن و ایمنی کن تینا کڑد ءِ ادا کے۔ اسمبلی نا باسک آتیٹی جتا کالج آتا طالب علم آتے اسمبلی آ بننگ آ ببوخیرٹ اٹ پاریر۔ اسمبلی نا دیوان اٹی صوبائی وزیر محمد خان شاہوانی پارے کہ محکمہ ایس اینڈ جی اے ڈی ٹی 156نائب قاصد آتا تعیناتی میرٹ آ مسنے ولے اگہ اسمبلی نا باسک آتے گڑتی ارے تو اودے مر کننگ کن تیار اُٹ ہراڑآ اسپیکر صوبائی سلاہکار کانود سردار رضا محمد بڑیچ نا سروکی ٹی کمیٹی اس جوڑ کرے ہرا اسہ ہفتہ اسے نا تہٹی معاملہ نا جاست و پاست ءِ کیک۔ داکان مست باسک صوبائی اسمبلی عاصم کردگیلو پارے کہ محکمہ ایس اینڈ جی اے ڈی ٹی نائب قاصد آتا آسامی تیا میرٹ نا برخلاف تعیناتی مسنے اسپیکر غٹ تعیناتی تے منسوخ مننگ نا رولنگ ایتے۔ اپوزیشن باسک سردار عبدالرحمان کھیتران ، انجینئر زمرک خان ، ولیم جان برکت ہم ہندا تعیناتی تا بابت تینا گڑتی تا درشانی ءِ کریر۔ صوبائی وزیر عبدالرحیم زیارتوال ایوان ءِ پارے کہ بوچستان اٹی اڈ ہلوک کمیونٹی اسکول بدستور قائم ءِ اوٹی خوانفوک آ استاد آتا تنخواہ تے 10 ہزار آن ودفسا 14ہزار روپئی کننگانے ۔ صوبائی وزیر تعلیم اپوزیشن لیڈر مولانا عبدالواسع نا کنڈآن چست کروک آ سوج انا ورندی ٹی پارے کہ حکومت بلوچستان سپریم کورٹ نا کنڈآن اردو ءِ دفتری زبان نا وڑاٹ راج کننگ نا فیصلہ نا بابت گام گیج کننگ ءِ نن سپریم کورٹ نا فیصلہ غا پدریسہ عملدرآمد کننگ اُن ۔ صوبائی وزیر ڈاکٹر حامد خان اچکزئی ایوان ءِ پارے کہ گدرینگوک آ دیوان اٹی کنا ساڑی مفننگ اٹی باسک صوبائی اسمبلی خالد لانگو تینا حلقہ نا بابت ہیت کریسس اودے باوری ایتیوہ کہ اوڑتون تولسا اونا گڑتی تے مر کیوہ۔ صوبائی وزیر نواب ایاز خان جوگیزئی اعتراضی ٹک آ خیال آتا درشانی ءِ کرسا پارے کہ کوئٹہ ٹی آباد قوم تا ڈغار تیا کوزہ کننگ انگ ءِ دابابت مہالو ہم بازئی قبیلہ نا بندغ آک اعتراض کریسر ہراڑآ وزیراعلیٰ کمشنر کوئٹہ نا سروکی ٹی کمیٹی اس جوڑ کریسس دابابت ایوان ءِ پت اٹی ہلنگے۔ اسپیکر اسہ کمیٹی اس جوڑ کے ہرا دا بابت رپورٹ تیار کرسا ایوان اٹی پیش کیک۔ قائد حزب اختلاف مولانا عبدالواسع خیال آتا درشانی ءِ کرسا پارے کہ کوئٹہ ٹی چندی ڈغار تیا کوزہ نا چرجوئی برجاءِ۔ اوپارے کہ کیڈٹ کالج قلعہ سیف اللہ نا پرنسپل ءِ بدل کننگے ہراڑآ صوبائی وزیر تعلیم عبدالرحیم زیارتوال پارے کہ نن پشین و مستونگ کیڈٹ کالج نا ایسر نا چاری ویل آتا ایسری کن گام گیج کننگ اُن، قلعہ سیف اللہ کیڈٹ نا ویل آتا ہم جاچ ءِ ہلنگک ولے نن کس اسے نا خواہش ءِ مون آ تخسا نن پالیسی جوڑ کپنہ ادارہ غاتے سوگو و میرٹ آ فیصلہ کینہ۔ ہراڑآ اسپیکر راحیلہ حمید خان درانی گورنر بلوچستان نا حکم نامہ ءِ خوانسا اسمبلی نا دیوان ءِ بے وخت مد اسکان ملتوی کرے۔
