اسلام آباد ۔ 13مارچ (اے پی پی) وزیراعظم نا صاحبزادی مریم نواز شریف پارینے وویمن پارلیمانی کاکس نیاڑی تے بااختیار جوڑ کننگ و اوفتا کاز ءِ مون آ ودفنگ اٹی اہم کڑد ادا کننگ ءِ ۔ دوشنبے نا دے وویمن پارلیمانی کاکس ناکنڈآن مسہ دے ئی جہانی کانفرنس آن تران کرسا مریم نوا زشریف پارے کہ پارلیمنٹرین نا حیثیت اٹ نیاڑیک راج انا بدلی نا نمائندہ ثابت مننگ کیرہ ۔ او بروک آ دور اٹی جمہوریت نا ازسر نو تعریف و راجی انصاف ءِ المی جوڑ کننگ کیرہ۔ او پارلیمنٹ نا باسک آتا زور شاغا کہ او تینا ہم عصر نیاڑی تا است بڈی ءِ کرسا اوفتے کن خوشی نا نوید اس جوڑ مریر۔ اوپارے کہ داالمی اف کہ اسہ نیاڑی اسے نا سرسہبی ٹی نرینہ نا دو مرے بلکن نیاڑیک ہم نیاڑی تا سرسہبی نا سوب جوڑ مننگ کیرہ۔ اوپارے کہ جان جوڑ مکالمہ و سیوت آن نیاڑیک سوگو مریرہ۔ اوکانفر نس نا اڈتننگ آ قومی اسمبلی نا اسپیکر ایاز صادق و وویمن پارلیمانی کاکس ءِ مبارکبادی تس ہرانا مسخت نئے بیرہ نیاڑی تا بنداوی حق و زمواری تے تالان کننگ نا ءِ بلکن جہانی شونداری ٹی پاکستانی و سویلی ایشیا نا نیاڑی تا توار ءِ ہم اوار کننگ نا ءِ۔ مریم نواز تینا لمہ کلثوم نواز ءِ خراج عقیدت پیش کننگ آ وویمن پارلیمانی کاکس نا سیکرٹری شائستہ پرویز ملک تون اظہار تشکر کرے و پارے کہ او واقعی بھاز جوان ءُ لمہ اسے و او تینا لمہ نا نقش قدم آ چلینگ انگ و اونا اقدار و روایت آتے مون آ دننگ نا کوشست کننگ ءِ۔
