اسلام آباد۔ 13مارچ (اے پی پی) وزیر داخلہ چوہدری نثارعلی خان پارینے کہ کراچی آپریشن 2013ء ٹی بنجائی حکومت نا پارت آ بنا ء کننگا و داسہ اودے ایسری انجام اسکان سرکننگ نا گرج ءِ۔ داخیال آتا درشانی ءِ او دوشنبے نا دے گورنر سندھ محمد زبیر تون اوڑدہی ٹی کرے۔ وزیر داخلہ پارے کہ بنجانا نمائندہ مننگ نا حیثیت آن ہراڑے نا قابلیت و سیاسی شعور و پختگی آن سندھ انا انتطامی مشینری و الس مستفید مریک ہموڑے سیاسی عمل ہم پین پکا مریک۔ اوڑدہی ٹی صوبہ سندھ و خاص کر کراچی ٹی امن و ایمنی نا بابت جاری گام گیج و صوبہ نا سیاسی حالیت آتیا خیال آتا درشانی ءِ کننگا۔ ہڑتوم آ راہشونک کراچی ٹی امن و ایمنی کن رینجرز ، انٹیلی جنس ، ایجنسی و کانود نافذ کروک آ ادارہ غاتا کڑد آ است جمی نا درشانی ءِ کریر۔ وزیر داخلہ پارے ک شارِ قائد نا امن غٹ سیاسی واک آتا اسیجائی زمواری ءِ، وخت بسنے کہ غٹ سیاسی جماعت آک تینٹ احتسابی نا عمل ءِ مون آ درسا نئے بیرہ ڈوہدار بندغ آتے کن تینا درگہ ءِ آخبتی وڑاٹ بند کیر بلکن دُن انگا عنصر آتا پیدواری ٹی کانود نافذ کروک آ ادارہ غاتون پبی تفر۔ وزیر داخلہ گورنر سندھ ءِ اونا تعیناتی آ مبارکبادی ہم تس۔
