اسلام آباد۔ 13مارچ (اے پی پی) وزیر داخلہ چوہدری نثارعلی خان تون برطانوی ہائی کمشنر تھامس ڈریو اوڑدہی کرے۔ اوڑدہی ٹی پاک برطانیہ تعلقداری و برطانوی ہوم سیکرٹری نا گمانی دورہ پاکستان نا بابت ہیت وگپ کننگا۔ وزارت داخلہ نا جاری بیان نارداٹ وزیر داخلہ پارے کہ ہڑتوم آ ملک آتا سروک آتا نیام اٹ ساڑی آ گچین تعلقداری تیان فائدہ ہرفسا ہڑتوم آ کنڈآتا کمکاری ئِ پین مون آ دننگ کن گام گیج آتا گرج ئِ ، برطانوی ہوم سیکرٹری نا دورہ ہراڑے ہڑتوم آ کنڈآتا تعلقداری تے پین سوگو کننگ اٹی کمکار جوڑ مریک ہموڑے دادورہ آن ہڑتوم آ کنڈآتا کمکاری ئِ ہم مون آ دننگ رسینگک۔ وزیر داخلہ پارے کہ گڑاس معاملہ غاتیٹی پاکستان نا گڑتی ئِ ، اومیت ئِ کہ برطانوی ہوم سیکرٹری نا دورہ آن دا گڑتی تا ایسری ٹی کمک رسینگک۔ اوپارے کہ اسیجائی مفادآتا دوئی و ڈیہہ نا امن کن المی ئِ کہ تین پہ تینی آزموندہ و قابلیت آن استفادہ کرسا ہڑتوم آ کنڈآتا کمکاری نا سوگو و مربوط نظام اس رائج کننگے۔
