امن و شونداری نا دشمن تے لمہ وطن نا امن وسلامتی ٹی اڑاند شاغنگ نا موکل تفننگک
آپریشن ”ردالفساد“ آ پیش رفت و سرسہبی تا جاچ ئِ ہلنگا
پاک اوغان سیم انا گچین بست و بند نا بارواٹی ساڑی آ گام گیج آتا ہم سرجم جاچ ئِ ہلنگا
اسلام آباد۔ 13مارچ (اے پی پی) ملک انا سیکورٹی نا بابت بڑزکو کہول انا دیوان اٹی دا عزم انااعادہ کننگاکہ امن و شونداری نا دشمن تے لمہ وطن نا امن و سلامتی ٹی اڑاند شاغنگ نا ہرگز موکل تفننگک۔ داہیت انا درشانی ئِ دوشنبے نا دے وزیراعظم محمدنواز شریف نا کماشی ٹی سیکورٹی نا بابت بڑزکو کہول نا دیوان اٹی کننگا۔ وزیراعظم ہاﺅس اٹی اڈ ہلوک آ دیوان اٹی آپریشن ”ردالفساد“ آ پیش رفت و سرسہبی تا جاچ ئِ ہلنگا۔ دیوان اٹی امنائی وڑاٹ داہیت انا اعادہ کننگا کہ دہشت گردی و انتہاءپسندی نا چٹفنگ پاکستان نا سلامتی کن پالیسی گرج اسے۔ وزیراعظم پاک فوج و کانود نافذ کروک آ ایلو ادارہ غاتا کنڈآن داوخت اسکان نا پیش رفت آ است جمی نا درشانی ئِ کرے و پارت کرے کہ عملدرآمد نا رفتار ئِ پین ترند کننگے۔ دیوان اٹی انسداد دہشت گردی نا کوشست آتا بابت چندی کانود آتا ہم جاچ ئِ ہلنگا و دا کانود آتے پین گچین جوڑ کننگ نا وڑوڈول آتیا ہم سجفنگا۔ دیوان نا ساڑی مروک آک فوج و سول سیکورٹی کارندہ و پاکستان نا امن پسند خلقت نا قربانی تے خراج تحسین پیش کرسا داہیت آ زورشاغار کہ امن و شونداری نا دشمن تے وخت اس ہم ملک انا امن وسلامتی نا حالیت آتے خراب کننگ نا ہرگز موکل تفننگک، قومی لائحہ عمل آ عملدرآمد نا بارواٹی کوشست آتے پین سوگوی تننگ و بنجائی و صوبائی حکومت آتا کنڈآن قومی لائحہ عمل آ گچین عملدرآمد ئِ المی جوڑ کننگ نا ہم فیصلہ کننگا، پاک اوغان سیم انا گچین بست و بند آتا بارواٹی ساڑی آ گام گیج آتا ہم سرجم جاچ ئِ ہلنگا۔ دیوان اٹی وزیر داخلہ چوہدری نثارعلی خان ، وزیر خزانہ محمد اسحاق ڈار ، چیف آف آرمی اسٹاف جنرل قمر جاوید باجوہ ، وزیراعلیٰ پنجاب محمد شہباز شریف ، وزیراعظم نا سلاہکار سرتاج عزیز ، قومی سلامتی نا سلاہکار لیفٹیننٹ جنرل (ر) ناصر خان جنجوعہ و ڈی جی آئی ایس آئی لیفٹیننٹ جنرل نوید مختار آن بیدس ایلو سینئر سول و عسکری کمامدارآک ہم ساڑی ئسر۔
