اسلام آباد۔ 18 جنوری (اے پی پی) وزیراعظم نا سلاہکار احتساب و داخلہ شہزاد اکبر پارینے کہ این آر او نا بھاریم 29 ملین ڈالرنا وڑاٹ الس نا کوپہ غاتیاٹی ءِ،براڈ شیٹ انا بابت دستاویز آتے پبلک کننگانے، وزیراعظم عمران خان نا کماشی ٹی حکومت شفاف احتساب آ یخین تخک۔ داخیال آتا درشانی ءِ او دوشنبے نادے آ پریس کانفرنس آن تران کرسا کرے۔ اوپارے کہ براڈ شیٹ انا بابت گڑاس دستاویز آتے پبلک کننگ اُن۔ براڈشیٹ نا بابت اہم دستاویز آتے پبلک کننگ کن براڈ شیٹ نا وکیل آتون ننا وکیل آک رابطہ کریر۔ اوداڑآ ہچ ءُ اعتراض اس کتوس۔ اوپارے کہ شفافیت آن بیدس احتساب نا عمل مننگ مفک۔ ساڑی حکومت شفافیت ءِ پک کننگ کن دادستاویز ءِ پبلک کننگ ءِ۔ سلاہکار احتساب پارے کہ نیب و براڈ شیٹ انا نیام اٹ معاہدہ جون 2000اٹی مسوسس۔ ہنداوڑ جولائی 2000اٹی انٹرنیشنل ایسٹ ریکوری (آئی آر اے) تون معاہدہ مس۔ دسمبر 2000اٹی ڈیل کرسا نواز شریف سعودی عرب آ ہناسس۔ اوپارے کہ 28 اکتوبر 2003 اٹی براڈ شیٹ اتون معاہدہ ءِ منسوخ کننگا۔ 2007 ء ٹی براڈ شیٹ و آئی آر اے حکومت پاکستان ءِ اونا تروئی زرتس انا نوٹس تس۔ 20مئی 2008 آ براڈ شیٹ تون معاہدہ مس ہرانا رداٹ 1.25 ملین ادا کننگا۔ ہمووخت آ یوسف رضا گیلانی وزیراعظم ئس۔ 2009ء آ براڈ شیٹ دُوارہ دا زر انا زرتس اکن حکومت پاکستان نا برخلاف ثالثی عدالت آ ہنا۔ جنوری 2016ء آ دا معاملہ غا حتمی دلیل بناکرے ہمووخت آ نواز شریف وزیراعظم ئس۔ 5 اگست 2016ء آ دانا فیصلہ براڈ شیٹ انا حق و پاکستان نا برخلاف مس۔ 2 سال آن پد جولائی 2018 ء ٹی براڈ شیت ءِ زر انا زرتس نا تعین ءِ کننگ نا فیصلہ ءِ کننگا۔ ہمووخت آ نگران حکومت ئس۔ اوپارے کہ اگست 2018ء ٹی پاکستان تحریک انصاف نا حکومت بس۔ جولائی 2019ء ٹی نن لندن ہائی کورٹ اٹ دافیصلہ نا برخلاف اپیل کرین۔ 2020ء ٹی براڈ شیٹ نا حق اٹی عبوری فیصلہ مس۔ اوپارے کہ براڈ شیٹ ءِ زرتس خراج تروک آتا پیسہ غاتیان تننگا۔ مستین تروک آ این آر او نا بھرم ءِ کُننگ اُن۔ اوپارے کہ ایون فیلڈ انا مد اٹی براڈشیٹ ءِ 1.5 ملین ڈالر تننگانے۔ نواز شریف نا ایلو میرات آتا مد اٹی 19 ملین ڈالر براڈ شیٹ ءِ ادا کننگا۔ ایون فیلڈ تون اوار ایلو میرات آک داررپورٹ نا رداٹ ثابت شدہ ءُ۔ دارپورٹ اٹی شہباز شریف آ 7.3 ملین ڈالر وڈٛی خوری و ہائی ویز اٹی 160 ملین ڈالر کک بیکس انا پیدواری ءِ کننگانے۔ انت ہندا چارٹر آف ڈٛیموکریسی ءِ۔ دا اونا 2000آن مست انا وڈی خوری ءِ ہرانا پیدواری آ 20 درسد براڈشیٹ ءِ زرتننگانے۔ اوپارے کہ وزیراعظم عمران خان دا معاملہ نا بابت سلاہ و سوج آتا تیاری کن وزرا کمیٹی اس جوڑ کرینے ہرا 48 گھنٹہ ٹی تینا سلاہ و سوج آتے وزیراعظم ءِ پیش کیک۔ اوپارے کہ احتساب نا عمل نا کمک اٹ کانود نا رداٹ سزا ترفنگ المی ءِ۔ نن تینا ادارہ غاتیا بایدے پت کین۔ اوپارے کہ نیب انا ساڑی سرکڑدہ ئی ٹی نیب گچین کاریم کننگ ءِ۔ تدوک آ 10 سال انا مقابلہ ٹی نیب انا تدوک آ 2 سال انا ریکوری اونا بے مٹ کارکڑد انا شاہدی ءِ۔
