اسلام آباد۔ 18 جنوری (اے پی پی) وزیر خارجہ مخدوم شاہ محمود قریشی پارینے کہ نن مہالو آن پیدوار کریسن کہ بھارت پلوامہ جلہو نا آڑاٹ چال اس چلیفنگ کیک۔ آخر کار بھارت نا ہمو سازش بے نقاب مس۔ بھارت تینا سیاسی مسخت و تینا داخلی باندات آن چکار ءِ اسہ کنڈ کننگ کن مچ آ ڈیہہ نا امنءِ شیف و بڑز کننگ اٹ لگوک ءِ۔ دوشنبے نادے آ بھارتی سازش بے نقاب مننگ نا بابت اسہ اہم ءُ بیان اسے ٹی وزیر خارجہ پارے کہ پلوامہ واقعہ نا بابت کنا بیانک آن ریکارڈ ءُ۔ نن پیدوار کریسن کہ پلوامہ بھارت نا کنڈآن اسہ فالس فلیگ آپریشن اسے و اونا آڑاٹ بھارت چال اس چلیفنگ کیک۔ آخر کار بھارت نا ہمو سازش بے نقاب مس۔ مودی سرکار گچین کاری تے کٹنگ کن تینا ہی 40 فوجی تا جان ءِ ہلک۔ دا40 فوجی تا زوال مننگ آ غمزدہ متوکہ بلکن اونا منظور نظر اینکر خوشی نا درشانی ءِ کرسا پارہ کہ دا مودی نا کٹنگ کن جوان ءُ چال اس جوڑ مریک۔ وزیر خارجہ پارے کہ بھارتی حکمران تینا سیاسی مسخت و تینا داخلی باندات آن چکار ءِ اسہ کنڈ کننگ کن مچ آڈیہہ نا امن ءِ شیف و بڑز کننگ اٹ لگوک ءِ۔ نن ڈیہہ ٹی امن و سوگوی خوانہ وخت اس کہ بھارت ہندوتوا سوچ انا بدامنی خواہک۔ اوپارے کہ بھارت اوغانستان اٹی اسہ سپائیلر نا کڑد ءِ ادا کننگ ءِ۔تاریخ شاہد ءِ کہ 26 فروری آ ہراتم اوفک پاکستان آ جلہو گیر مننگ نا کوشست کریر تو نن سگ انا درشانی ءِ کرین، و جوزہ خیر سگالی نا رداٹ اوفتا دزگیر مروک پائلٹ ءِ پدی تسن۔ 14 نومبر آ نن بھارت نا ریاستی دہشت گردی و بھارت نا کنڈآن دہشت گرد آتا پشت پناہی نا ناقابل تردید شاہدی دنیا نا مون ءِ تخان۔ ای یوڈس انفولیب انا چشم کشا انکشاف بھارت نا ناپاک عزم انا پاڑ ءِپٹانے۔ وزیر خارجہ پارے کہ بھارت داسہ پورووڑاٹ بے نقاب مسنے نن خوانہ کہ دنیا ننا ڈوزیئر آتے سنجیدگی اٹ ہرسا بھارت نا برخلاف پیش کروک آ پبی شاہدی تا جاچ ءِ ہلے و اودے زموار گوندے۔ وزیر خارجہ پارے کہ امریکہ ٹی 20 جنوری آ پوسکن آ سرکڑدہ عنان حکومت سنبھالنگ والا ءِ ہرا انسانی حق انا ہیت ءِ کیک و مذاکرات نا کمک اٹ جھیڑہ غاتا ایسری نا مخ تف ءِ۔ پاکستان ہم مدام مذاکرات نا کمک اٹ جھیڑہ غاتا ایسری نا ہیت ءِ کرے لوے بھارت مدام چاگڑد ءِ خراب کرے۔ ہندوستان اسٹ آن پد ایلو تینا غیر زموارانہ حرکت آتا سوب آن بے نقاب مننگ ءِ۔ اینو برطانوی پارلیمنٹ اٹی بھارت نا برخلاف توار بڑز مننگ ءِ۔ دہ انا خڑک برطانوی پارلیمنٹ نا باسک پاننگ ءُ کہ بھارت انت کہ پاننگ ءِ او راست افس کشمیر جہانی کہول آ امنا مروک تنازعہ اسے دابھارت نا تہہ نا معاملہ اس اف۔ وزیر خارجہ پارے کہ بھارت ننا میڈیا نا آجوئی آ سوج ہرفک ولے اینو آر ایس ایس نا منشور آ روان، بی جے پی سرکار و اونا منظور نظر میڈیا نا گٹھ جوڑ پاش آن پاش غٹ انا مون آ بے نقاب مسنے، ہراوڑ اہم اودیم معلومداری، وخت آن مست اسہ اینکر اسے آ سرمننگ کیرہ۔ انت دا گچین کاری چاگڑد ءِ سازگار جوڑ کننگ کن ’’پلانڈ لیک‘‘ ئس۔ نن دا غٹ ٹک آتے جہانی کہول آ پبی وڑاٹ ہرفنہ۔
