اسلام آباد۔ 11 جنوری (اے پی پی) چیئرمین سینیٹ محمد صادق سنجرانی پارینے کہ ہڑتوم آ ایوان تا نیام اٹ آئین سازی و انتظامی امور آ بے مٹ کمکاری ساڑی ءِ، کانودسازی ءِ پین گچین کننگ کن پارلیمانی راہشون تتون سلابت و فعال رابطہ نا پالیسی آ عمل کننگ اُن، کورونا دین انا سوب آن پارلیمنٹ نا ہڑتوم آ ایوان تا دیوان تا بابت مشکل مون تروک ءِ۔ داخیال آتا درشانی ءِ او اسپیکر قومی اسمبلی اسد قیصر تون گپ وتران کرسا کرے ہرا دوشنبے نادے آ داڑے اوڑتون اوڑدہی کرے۔ اوڑدہی ٹی ہڑتوم آ راہشونک پارلیمانی امور و اہم قومی باندات آتیا گپ وتران کریر۔ اوڑدہی ٹی چیئرمین سینیٹ محمد صادق سنجرانی پارے کہ ہڑتوم آ ایوان تا نیام اٹ آئین سازی و انتظامی امور آ بے مٹ کمکاری ساڑی ءِ۔ کانود سازی ءِ پین گچین کننگ کن پارلیمانی راہشون تتون سلابت و فعال رابطہ غاتا پالیسی آ عمل کننگ اُن۔ اوپارے کہ کورونا نا دین انا سوب آن پارلیمنٹ نا ہڑتوم آ ایوان تا دیوان تا بابت مشکل مون تروک ءِ۔ اوپارے کہ ہڑتوم آ ایوان تا گچین حکمت عملی نا سوب آن کورونا دینی مشکل آتیان پد ہم المی کانود سزی ٹی تعطل بتنے۔ ہڑتوم آ ایوان تا سرکڑدہ پارلیمنٹ نا باسک و ملازم آتا رکھ اکن اسیجا پالیسی آ عمل کننگ اُن۔ صادق سنجرانی پارے کہ وخت آ رکھی گام گیج و احتیاط کننگ نا سوب آن پارلیمنٹ اٹ کورونا نا دین انا مون ءِ توننگ اٹ کمک رسینگا۔ کانود سازی و انتظامی امور اٹ بے مٹ کمکاری آ اسپیکر قومی اسمبلی نا منت وار اُن۔
