اسلام آباد۔ 10 جنوری (اے پی پی) پاکستان اٹی اینخو سال انا اولیکو پنچ دے ئی قومی پولیو تور مہم نا بنامننگ ءِ۔ دامہم اٹی پنچ سال اسکان نا چار کروڑ چناتے پولیو آن بچفنگ نا پڑی کنفنگک وخت اس کہ 6 آن 59 تُو انا چناتے وٹامن اے انا خور ہم تننگک۔ داخور آن چناتا قوت مدافعت اٹ ودکی مریک و پولیو و ایلو ناجوڑی تا برخلاف قوت مدافعت ودی مریک۔ دامہم اٹی 2 لکھ 85 ہزار فرنٹ لائن ورکرزکورونا غان بچنگ کن رکھی گام گیج آتیا سختی اٹ عملدرآمد کرسا اُرااُراغا ہنسا مہم اٹی بشخ ہلیرہ۔ پولیو ورکرنئے بیرہ ماسک و سینیٹائزر آتے کاریم اٹ اتیرہ بلکن راجی فاصلہ ءِ ہم پک کیرہ تانکہ کورونا نا تالانی ءِ توننگ مرے۔ جاری بیان اٹی وزیراعظم نا کمکار جان جوڑی ڈاکٹرفیصل سلطان پارے کہ ‘‘ننامسخت چناتے وخت آ ویکسین تننگ ءِ پک کننگ ءِ۔ ویکسین آں ننا چناتا قوت مدافعت اٹ ودکی مریک و داوڑ او گچین وڑاٹ پولیو تون اوار ایلو ناجوڑی تا مقابلہ ءِ کننگ کیرہ۔ حکومت ملک ءِ پولیو آن پاک کننگ کن سنبرینگوک ءِ و داڑکن غٹ مکتبہ فکر و خاص وڑاٹ لمہ و باوہ غاتا کمک نا گرج ءِ کہ او پنچ سال اسکان نا چناتے ویکسینیشن ءِ پک کیر’’۔ جاری بیان نا رداٹ 2020ء ٹی دوئی کروک آ ہدف آتا بنداو آ 2021ء دین انا مون ءِ توننگ کن سازگار ءِ۔ پولیو پروگرام 2020ء ٹی سرسہبی اٹ شش مہم آتا بناءِ کرے۔ دامہم آتیٹی پولیو ورکرز آتا کڑد ستاکڑزوک ئس ہرافک کورونا دین آن بچنگ کن رکھی گام گیج آتیا سختی اٹ عمل کرسا درکار ہدف آتے ممکن کرینو۔ کوآرڈینیٹر قومی ایمرجنسی آپریشنز سینٹر ڈاکٹر رانا صفدر پارے کہ 2020ء ٹی دوئی کروک آ سرسہبی ءِ داسال ہم برجاتخنہ۔ پولیو مہم آتون اوار رکھی ٹیکہ جات ءِ ہم پک کننگک۔ وار وار مہم آک چناتا قوت مدافعت اٹ ودکی ناسوب ءُ’’۔ اومستی پارے کہ ‘‘سال 2021ء ٹی دین انا مون ءِ توننگ کن گچین بھرم تا گمان ءِ’’ پولیو پروگرام ءِ لیڈر شپ انا کمک دوئی مریک و گمان ءِ کہ غٹ مکتبہ فکر تدوک آ سال آنبار تینا پبی کڑد ءِ اداکیرہ۔ سال 2021ء نا مہم آتا خاص ہیت دادے کہ مہم آک اوغانستان تون اسہ ہی وخت اٹی مریرہ ہراڑآن بھلو کچ اسے آ دین انا مون ءِ توننگ مریک۔
