اسلام آباد۔ 10 جنوری (اے پی پی) سویل اٹ پائیدار شونداری کن سائنس و ٹیکنالوجی نا کمیشن (کامسیٹس) یمن اٹی سائنس و ٹیکنالوجی یونیورسٹی نا جوڑ کننگ کن ہر کہول آ کمک فراوان کننگ نا باوری کرفینے۔ کامسیٹس نا صدر دفتر آتا دورہ غا بروک آ جمہوریہ یمن نا سفیر ایچ اے محمد موطہارالہابی، یمن نا وزیر بڑزکو تعلیم و سائنسی پٹ وپول نا کنڈآن کامسیٹس نا ایگزیکٹو ڈائریکٹر ڈاکٹر ایس ایم جنید زیدی ءِ اسہ چھٹی اس تسر۔ ہراٹی سائنس و ٹیکنالوجی نا یونیورسٹی نا جوڑ کننگ کن کامسیٹس آن کمک خواہنگاسس۔ یمن نا کنڈآن نوشتہ کروک آ چھٹی ٹی 27 پدتموک ملک آتا بین السرکاری و جہانی تنظیم کامسیٹس نا پاکستان اٹ ساڑی کامسیٹس یونیورسٹی اسلام آباد و اونا ایلو کیمپ آتا ذکر ءِ کننگاسس۔ یات سلے داسہ دا یونیورسٹی ملک اٹی پبلک سیکٹر نا اسہ پنی ءُ یونیورسٹی اس جوڑ مسنے۔ جمہوریہ یمن ہم کامسیٹس نا باسک ملک آتیٹی اوار ءِ و او کامسیٹس یونیورسٹی اسلام آباد نا وڑآ تینا ملک اٹی جوڑ مروک آ یونیورسٹی کن کامسیٹس نا مریس آزموندہ غان فائدہ ہرفنگ خواہک۔ جمہوریہ یمن نا وزیر تینا چھٹی ٹی کامسیٹس نا سلابتی کمیٹی نا دیوان اٹی بشخ ہلنگ نا قول ہم کرے، دا دیوان 2021ء ٹی اڈہلیک۔ کامسیٹس نا ایگزیکٹو ڈائریکٹر ڈاکٹر ایس ایم جنید زیدی تون گپ و تران کرسا شرفمند آ سفیر پارے کہ کامسیٹس نا پلیٹ فارم آن یمن ایلو پدتموک ملک آتون تین پہ تینی کمکاری ءِ مون آ دننگ تون کامسیٹس‘نیٹ ورک آف انٹرنیشل سائنس و ٹیکنالوجی مراکز آف ایکسی لینس اٹ اسہ آر اینڈ ڈی سینٹر و یمن نا پوسکن آ یونیورسٹی ءِ اوار کننگ اٹ کمک فراوان کیک۔
