اسلام آباد۔ 10 جنوری (اے پی پی) چیئرمین سینیٹ صادق سنجرانی پارینے کہ بھارت مقبوضہ کشمیر اٹی سرکاری دہشت گردی کننگ ءِ، بھارت نا کنڈآن مقبوضہ جموں و کشمیر نا الس آ کروک آ ظلم و انسانی حق انا لتاڑتیا جہانی کہول آ توار بڑز کننگ کن او دنیا نا مچ آملک آتا 56 ہزار پارلیمنٹ نا باسک و گچین نمائندہ غاتے چھٹی نوشتہ کینہ ہرافتا کمک اٹ او جہانی برادری نا گچین مروک آ نمائندہ غاتا چکار ءِ مقبوضہ جموں و کشمیر نا برجا بدترین ریاستی دہشت گردی نا کنڈآ کرفک۔ چیئرمین سینیٹ داخیال آتا درشانی ءِ تحریک کشمیر برطانیہ نا صدر راجہ فہیم کیانی تون اوڑدہی ٹی کرے۔ چیئرمین سینیٹ مچ آ دنیا ٹی رہینگوک آ پاکستانی و کشمیری تے پنج اگست 2019 نا واقعہ غان پد کشمیری تا حق اٹ توار بڑز کننگ آ اونا منت واریءِ ہرفے۔ داوخت آ صدر تحریک کشمیر برطانیہ راجہ فہیم کیانی پارے کہ پنچ اگست آن پد برطانیہ و یورپ اٹ رہینگوک آ پاکستانیک ہراوڑاٹ مقبوضہ کشمیر نا ایلم تتون یکجہتی نا درشانی ءِ کریر اوفتا درور ملیپک۔ صدر تحریک کشمیر برطانیہ راجہ فہیم کیانی پارے کہ تاریخ اٹ اولیکو وار برطانوی پارلیمنٹ اٹی پنجا آن زیات پارلیمںٹ نا باسک کشمیری تا جہد نا مخ تفی ءِ کریر و مقبوضہ کشمیر نا الس ءِ باوری کرفیر کہ او اوفتا حق خودارادیت نا مخ تفی ءِ کیرہ۔ راجہ فہیم کیانی چیئرمین سینیٹ ءِ پارے کہ برطانیہ ٹی رہینگوک آ کشمیری و پاکستانی ملک انا شونداری و شونہالی ٹی تینا کڑد ءِ ادا کننگ خوارہ۔ او پاکستانی زرگزران ءِ سوگو کننگ خوارہ، دیارغیر اٹ رہینگوک آ پاکستانی و کشمیری تااست پاکستان تون سُرک و اوتینا ملک ءِ دفاعی و اقتصادی وڑاٹ سوگو ہُننگ خوارہ۔
