اسلام آباد۔ 08 جنوری (اے پی پی) وزیراعظم عمران خان پارینے کہ ڈیجیٹل نظام آن ضرورت نا گڑاتا نہاد آتا چاروکی ءِ کننگ و ضلعی انتظامیہ ناکارکڑد ءِ ہُننگ اٹ کمک رسینگک، دا نظام آن فیصلہ سازی نا عمل اٹ شفافیت نا عنصر نمان مریک، حکومت کورونا نا دین اٹی نیزگار و مزور تپہ غاتے ریلیف فراوان کننگ آ پدریسہ چکار تخا، مچ آ دنیا ننا گام گیج آتا ستاءِ کرینے۔ داخیال آتا درشانی ءِ او جمعہ نادے آ پاکستان شماریات بیورو نا کنڈآن افراط زر انا کچ ءِ مون آ تخسا فیصلہ سازی نا نظام و کورونا نا دین انا راجی و زرگزرانی زہم تیا بریفنگ نا چرجوئی ٹی اڈہلوک آ دیوان نا کماشی ءِ کرسا کرے۔ دیوان اٹی بنجائی وزیر خزانہ ڈاکٹر عبدالحفیظ شیخ، بنجائی وزیر حوالکاری و شینکاری سینیٹر شبلی فراز، بنجائی وزیر ڈٹ بندی اسدعمر، بنجائی وزیر صںعت محمد حماد اظہر، سلاہکار واپار عبدالرزاق داؤد، خصوصی کمکار محصولات ڈاکٹر وقار مسعود و سینئر آفیسرآک بشخ ہلکر۔ باسک ادارہ شماریات دیوان ءِ معلومدار کرے کہ افراط زر انا کچ ءِ مون آ تخسا حکومتی فیصلہ سازی کن ڈٛیجیٹل نظام مرتب کننگانے، دانظام نا رداٹ شماریات بیورو ضرورت نا گڑاتا ڈیٹا ءِ مچ آ ملک انا ضلع غاتیان ہلیک و اونا تقابلی جاچ ءِ مرتب کیک۔ دیوان ءِ معلومدار کننگاکہ دا نظام وزیراعظم ناڈیجیٹل پاکستان ویژن نا رداٹ جوڑ کننگانے ہرانا سوب وخت آ فیصلہ سازی ممکن مننگ کے۔ دانظام آن قومی پرائس مانیٹرنگ کمیٹی، بنجائی وزارت،صوبائی حکومت و ضلعی انتظامیہ ءِ وخت آ ضرورت نا گڑاتا نہاد نا حساب وکتاب میسر مریک ہراڑآن وخت آ فیصلہ سازی ممکن مننگ کیک۔ وزیراعظم ڈیجیٹل نظام نا ستاءِ کرسا پارے کہ دانظام آن المی آ گڑاتا نہاد آتا چاروکی ءِ کننگ و ضلعی انتظامیہ نا کارکڑد ءِ ہُننگ اٹ کمک رسینگک۔ وزیراعظم پارے کہ دا نظام آن فیصلہ سازی ناعمل اٹ شفافیت نا عنصر نمان مریک۔ وزیراعظم ءِ کورونا نا دین انا راجی و زرگزرانی اثرآتا بابت کروک آ سروے آ سرجم حوال ہم تننگا۔ دیوان ءِ معلومدار کننگاکہ دا سروے ٹی روزگار، کٹیا، ترسیلات، خور، جان جوڑی و کورونا تون مون تننگ کن گام گیج آتا ڈیٹاءِ یکجا کننگا۔ داسروے نا رداٹ کورونا دین انا بناٹی زیات اُرا زرگزرانی وڑاٹ زہمی مسر ولے حکومت ناوخت آ گام گیج و سمارٹ لاک ڈاؤن نا پالیسی آن دا کچ جولائی 2020 آن کمتی نا کنڈآ ہنا۔ وزیراعظم پارے کہ حکومت کورونا دین اٹی پدریسہ چکار ءِ نیزگار و مزور تپہ غاتے ریلیف فراوان کننگ آ تخا۔وزیراعظم پارے کہ جہانی زرگزران کورونا دین آن زہمی مس ولے اللہ تعالیٰ نا کمک وحکومت نا وخت آ گام گیج آن پاکستان دا مشکل حالیت آتون مون تس و مچ آ دنیا ننا گام گیج آتا ستاءِ کرینے۔
