اسلام آباد۔ 08 جنوری (اے پی پی) وزیراعظم عمران خان ناروا کٹیا کننگ و کوڑی کننگ اٹ اوار زموار آتا برخلاف بے پرخ سخت کارروائی نا پارت کرسا پارینے کہ داوڑنا زموار آک غریب دشمن ءُ ہرا ہچ ءُ رعایت اسے نا حقدار افس، ضرورت نا گڑاتا مناسب نہاد آ فراوانی و وافر کچ اٹ ملنگ ءِ پک کننگے۔ داخیال آتا درشانی ءِ او جمعہ نادے آ بورہ نا نہاد و ملنگ نا بابت جاچ دیوان نا کماشی ءِ کرسا کرے۔ دیوان اٹی بنجائی وزیر خزانہ ڈاکٹر عبدالحفیظ شیخ، بنجائی وزیر صںعت وپیداوار محمدحماد اظہر، بنجائی وزیر ڈٹ بندی و شونداری اسد عمر، وزیراعظم نا سلاہکار واپار عبدالرزاق داؤد و ڈاکٹر عشرت حسین، خصوصی کمکار ڈاکٹر وقار مسعود و سینئر آفیسر آک بشخ ہلکر۔ چیف سیکرٹری پنجاب ویڈیو لنک انا کمک اٹ دیوان ءِ صوبہ پنجاب اٹی گنڈیری نا فصل، کرشنگ و بورہ نا ساڑی اسٹاک نا بارواٹی سرجم حوال تس۔ دیوان ءِ معلومدار کننگاکہ بورہ نا وافر ملنگ و نہاد آتا چاروکی نا بابت غٹ ڈویژنل نا کمشنر و ضلع غاتا ڈپٹی کمشنر آتا ہڑدے ئی بنداو آ ویڈیو لنک دیوان اڈتننگک۔ دیوان ءِ معلومدار کننگاکہ گنڈیری نا اصل اٹ کم وزن تول کننگ اٹ اوار بندغ و کٹیا خور بیوپاری تا برخلاف کانودی کارروائی بناکرینے ہراٹی کل 79 بندغ حراست اٹی ءُ و 190 ایف آئی آر کاٹ کننگانے۔ وزیراعظم پارے کہ ضرورت نا گڑاتا نہاد و وافر کچ اٹ ملنگ ءِ پک کننگے۔ وزیراعظم ناروا کٹیا خوری و کوڑی کننگ اٹ اوار زموار آتا برخلاف بے پرخ سخت گام گیج ہلنگ نا پارت کرے۔ وزیراعظم پارے کہ داوڑ نا زموارآک غریب دشمن ءُ ہراہچ ءُ رعایت اسے نا حقدار افس۔
