پشاور۔ 08 جنوری (اے پی پی) وزیراعظم نا سلاہکار تخفیف نیزگاری و راجی رکھ ڈاکٹر ثانیہ نشتر پارینے کہ تحریک انصاف نا ساڑی حکومت نیزگاری نا چٹفنگ و نیزگار تپہ ءِ زند انا بشخ آتا بابت آسراتی تا فراوانی کن غٹ وسیلہ غاتے کاریم اٹ اتنگ ءِ۔ داخیال آتا درشانی ءِ او تینا اِرادے ئی ڈیرہ اسماعیل خان نا وخت آ سرکٹ ہاؤس ڈیرہ اسماعیل خان اٹ میڈیا نا نمائندہ غاتون گپ وتران کرساکرے۔ داوخت آ ڈپٹی کمشنر ڈیرہ عارف اللہ، اسسٹنٹ کمشنرز، محکمہ تعلیم و ایلوتعلقدار محکمہ غاتا آفیسر ونمائندہ غاک ساڑی ئسر۔ میڈیا نا نمائندہ غاتون گپ وتران کرسا وزیراعظم نا سلاہکار تخفیف نیزگاری و راجی رکھ ڈاکٹر ثانیہ نشتر پارے کہ ساڑی حکومت نا کنڈآن نیزگاری نا چٹفنگ و نیزگار تپہ نا زند انا آب ءِ گچین کننگ کن چندی ڈٹ آتے جاری کننگانے ہرافتا تعلق مخلوق اٹ شعور و آگاہی بیدار کننگ بھاز المی ءِ تانکہ زیات آن زیات حقدار مخلوق دا ڈٹ آتابھرم آتیان فائدہ ہرفنگ کیر۔ اومستی پارے کہ دا مسخت کن محکمہ تعلیم نا خذمت آتے ہم ہلنگک انتئے کہ استاد آتا تعلقدار اسکول آتا کمک اٹ کمیونٹی تون براہ راست تعلق مریک و مرمر انگا علاقہ و اوفتے ٹی رہینگوک کمیونٹی تیان جوان وڑاٹ معلومدار مریرہ۔ اومیڈیا نانمائندہ غاتیان ہم خواست کرے کہ نما کڑد ہم داچرجوئی ٹی بھازاہمیت تخک انتئے کہ صحافی راج انا خن و خف مریک ہنداخاطرآن نم غٹ دابابت تینا کچ انا رداٹ کڑد ءِ ادا کبو انتئے کہ ہراڑے اسہ کنڈ زیات آن زیات حقدار مخلوق فائدہ ہرفک ہموڑے اسلام ہم انسانی خذمت نارغامک۔داوخت آ تران کرسا اوپارے کہ راجی رکھ انا بابت سروے ہر چار آصوبہ غاتیٹی برجاءِ مچ آ ملک اٹی سروے کم و ود 61 درسد وخت اس کہ ڈیرہ اسماعیل خان اٹی 22 درسد پورو کننگانے۔ دا سروے ٹی اُراتا معلومداری ءِ ہلنگک ہرانا بنداو آ پروگرام نا بشخ جوڑ کننگ نا فیصلہ کننگک۔ ڈیرہ اسماعیل خان اٹی ہم سروے ترندی اٹ برجاءِ ہرادے زوت پورو کننگک۔ اوباوری کرفے کہ دا سروے نامسخت نیزگار آتا کساس ءِ خلنگ و ضرورت مند آتا خذمت ءِ ہرکہ رنگ، نسل لسانیات و سیاست آن پورو پاک ءِ۔ اومستی پارے کہ دا چرجوئی ٹی ضلع نا کہول آ ڈسک اس ہم جوڑ کننگک ہرانا کمک اٹ سروے آن رہینگوک آ مخلوق فائدہ ہرفنگ کیک تانکہ حقدار بندغ آک دا آسراتی آن محروم مفس۔ اوپارے کہ تینا اِرادے ئی دورہ ٹی ضلع ٹانک و قبائلی ضلع سویلی وزیرستان نا دورہ ءِ ہم کیک۔
