مچھ اٹی مروک آ واقعہ سازش اسے، ہندوستان پورو وڑاٹ پاکستان اٹ بے چیٹی تالان کننگ نا کوشست کننگ ءِ، ننا انٹیلی جنس ادارہ غاک دہشت گردی نا چار بھلو ڈٹ ءِ بے سہب کریر، وزیراعظم عمران خان نا دود آن تران

اسلام آباد۔ 08 جنوری (اے پی پی) وزیراعظم عمران خان پارینے کہ مچھ اٹی مروک آ واقعہ سازش اسے، ہندوستان پورو وڑاٹ پاکستان اٹ بے چیٹی تالان کننگ نا کوشست کننگ ءِ، ننا انٹیلی جنس ادارہ غاک دہشت گردی نا چار بھلو ڈٹ بے سہب کریر، ہزارہ کمیونٹی تون نائن الیون آن پد بھاز ظلم مسنے، ہزارہ کمیونٹی مچھ واقعہ ٹی زوال مروک آتے جہہ جاگہ کیرہمودیا اوفتیا کوئٹہ غا بریوہ، سانحہ مچھ انا زہمی تا غٹ خواست آتے امنا کننگانے، لاش آتا جہہ جاگہ کننگ ءِ وزیراعظم نا بننگ تون گنڈنگ نا شڑت جوان اف، داوڑ کرپشن کروک آ داڑیل آتا ٹولہ ہم بلیک میل کیک، آئی ٹی نا بشخ ءِ آسودہی ترسا برآمدات و زرمبادلہ نا کوڑی تیٹی ودکی، روزگار نا وارخواہی ودی کننگ کینہ۔ او جمعہ نادے آ داڑے انفارمیشن ٹیکنالوجی زونز اتھارٹی نا جوڑ مننگ آن پد دود آن تران کریکہ۔ وزیراعظم پارے کہ نائن الیون آن پد پاکستان اٹی غٹ آن زیات ظلم ہزارہ کمیونٹی تون مس، اوفتے دہشت گردی نا نشانہ کننگا دا ہمو سازش نا بشخ اسے، ہرانا پیدواری ءِ ای تدوک آ سال مارچ اٹی کابینہ نا دیوان اٹ تخاٹ، اوکان پد السی کہول آ ہم دانا ذکر ءِ کریٹ کہ بھارت پورو وڑاٹ کوشست کننگ ءِ کہ پاکستان اٹ بے چیٹی ودی مرے، او پاکستان اٹ شیعہ، سنی عالم آتا خون ءِ کرسا مذہبی خار تالان کننگ خواہک، ننا اودیم ادارہ غاک اسلام آباد تون اوار ملک اٹی دہشت گردی نا چار بھلا جلہو آتا سازش ءِ بے سہب کریر، کراچی ٹی اسہ پنی ءُ سنی عالم دین اسے شست کننگا اوکان پد بھاز مشکل اٹ نن خاخر ءِ کسفین۔ وزیراعظم پارے کہ نن مچھ واقعہ ٹی قتل مروک آ خاہوت آتا غٹ شڑت آتے امنا کرینن، داواقعہ غان دمدستی پد وزیرداخلہ و ولدا اِرا وزیر ءِ کوئٹہ مچی کروک آتیان گرریفین، اوفتے باوری کرفین کہ اوفتے معاوضہ ایتنہ، اوفتاخیال ءِ تخنگک، اوکان پد ہم لاش آتا جہہ جاگہ کننگ ءِ وزیراعظم نا بننگ تون گنڈنگ مناسب اف، اگہ اوفتا داخواست ءِ مننگے تو پگہ کرپشن کروک آتون اوار ہر اسٹ بلیک میل کیک، داڑیل آتا ٹولہ دونیم سال آن این آر او کن بلیک میکل کننگ ءِ۔ اوپارے کہ خاہوت آتا ڈکھ و دڑد ءِ پہہ مرینہ او اینو تینا مقتولین تے جہہ جاگہ کیر ای اوفتیا اینو ہی بریوہ۔ اوانفارمیشن ٹیکنالوجی زونز اتھارٹی نا جوڑ کننگ آ عامر ہاشمی و امین الحق ءِ خراج تحسین پیش کرسا پارے کہ دا گام گیج ءِ بھاز مہالو ہرفوئی ئس، مچ آ دنیا ٹی آئی ٹی نا بشخ اٹی انقلاب بننگ ءِ، کوویڈ۔ 19 اٹی غٹ آن زیات آئی ٹی کمپنیک کٹیا کریر، نن آئی ٹی نا بشخ ءِ مون تروک اڑاند آتا بارواٹ نیشنل ڈیفنس یونیورسٹی(این ڈی یو) ٹی سیمینار کرفین، ہموڑے اونا پیدواری مس کہ ایف بی آر، اسٹیٹ بینک آن اوفتے انت آسراتی درکار ءِ۔ وزیراعظم پارے کہ اتھارٹی نا جوڑ کننگ نا مسخت آئی ٹی نا بشخ ءِ ہروڑنا آسراتی تننگ نا ءِ تانکہ دا سیکٹر شون ہلے، و دنیا ناایلو بھلا ورناتا آبادی داڑآن فائدہ ہرفنگ کے۔ اوپارے کہ دا بشخ آ چکار آن برآمد آتیٹی ودکی مریک، زرمبادلہ نا کوڑیک ودرہ، روپئی نا قدر مستحکم مریک۔ زرمبادلہ نا کوڑی تیٹی کمتی نا سوب آن ننے آئی ایم ایف آ ہنوئی تمک۔ اوپارے کہ اومیت ءِ کہ اتھارٹی نا جوڑ مننگ آن دا بشخ اٹی شونداری نا ذریعہ مریک۔ داڑآن امریکہ تون اوار پیشن نا ملک آتیٹی تولوک پاکستانیک ہم فائدہ ہرفنگ کیرہ و داگام گیج آن زرکاری بریک۔ وزیراعظم عامر ہاشمی ءِ یخین دہانی کرفے کہ حکومت دا زون تا مون تروک ویل آتے مُر کیک۔