اسلام آباد۔ 08جنوری (اے پی پی) بنجائی وزیر داخلہ شیخ رشید احمد پارینے کہ میت آتا جہہ جاگہ کننگ تون ہی وزیراعظم عمران خان کوئٹہ غا کاہک، نن خوانہ کہ دا ویل جوانی اٹ ایسر مرے ولے گڑاس مخلوق پہہ مفننگ ءُ و دامعاملہ ءِ سیاسی ایشو جوڑ کننگ خوارہ، بھلو کچ اسے آ سرچ آپریشن نا بناءِ کننگانے، وزیراعظم تفرقہ باز و دہشت گرد آتے چٹفنگ نا عزم تخک، گڑاس واکدار اہل تشیع و سنی تیٹی غلط گمانی و تصادم ودی کننگ خوارہ۔ جمعہ نادے آ پریس انفارمیشن ڈیپارٹمنٹ (پی آئی ڈی ) ٹی پریس کانفرنس آن تران کرسا وزیر داخلہ شیخ رشید احمد پارے کہ مچھ اٹی مروک آ سانحہ نا اخس کہ مذمت ءِ کننگے کم ءِ، ہزارہ برادری ءِ شست کننگ اٹ گڑاس واکدار اوار ءُ، اسلام آباد، سرگودھا و کراچی آن رڑ ہلنگانے ہرافک شیعہ سنی پھسات کرفنگ خوائسرہ۔ وزیراعظم عمران خان دہشت گرد و تفرقہ تالان کروک آتے چٹفنگ نا عزم تخک۔ شیخ رشید احمد پارے کہ خاہوت آتا غٹ خواست آتے منظور کرسا وزیراعظم ءِ رپورٹ تسوسن، اوفتا غٹ خواست آتے منظور کننگاسس ولے گڑاس مخلوق پہہ مفننگ ءُ، سیاست اٹ بروک آ تُوک بھاز اہم ءُ۔
