ننکانہ صاحب۔ 08 جنوری (اے پی پی) بنجائی وزیر انسداد منشیات بریگیڈیئر (ر) اعجاز احمد شاہ پارینے کہ 33 درسد ذہنی ناجوڑی تا سوب منشیات ءِ، منشیات بہا کننگ نا چٹفنگ کن کارروائی کننگک، سانحہ مچھ انا اخس کہ مذمت ءِ کننگے کم ءِ، داٹی پیشن نا دُو اوار ءِ۔ داخیال آتا درشانی ءِ او جمعہ نادے آ داڑے میڈیا تون گپ وتران کرسا کرے۔ بنجائی وزیر انسداد منشیات اعجاز احمد شاہ پارے کہ ملک آن منشیات نا چٹفنگ کن ہروڑنا گام گیج کننگ اُن، ملک اٹ 33 درسد ذہنی ناجوڑی تا سوب منشیات ءِ، منشیات بہاکننگ نا مون ءِ توننگا تو چناتا ناجوڑی تیٹی 50 درسد ودکی مریک۔ اوپارے کہ سانحہ مچھ انا اخس کہ مذمت ءِ کننگے کم ءِ، دا سانحہ ٹی پیشن نا دُو اوار ءِ، واقعہ ٹی اوار دوبہ دار آتے اوفتے اوفتا کروک نا سزا تننگک۔ اوپارے کہ مچ آ ملک اٹی منشیات فروشی نا چٹفنگ کن کارروائی کننگک، منشیات فروشی نا چٹفنگ کن الس ادارہ و حکومت تون تفر۔ اوپارے کہ ننکانہ صاحب ءِ ماڈل ضلع اس جوڑ کننگ کن غٹ وسیلہ غاتے کاریم اٹ اتنگ اُن۔ اوپارے کہ بابا گرونانک یونیورسٹی نا جوڑ مننگ آن بروک آ چین تا زند جوڑ مریک۔ اسہ سوج اسے نا ورندی ٹی اوپارے کہ اپوزیشن جماعت آک حکومت مخالفت اٹ یکجا مسنو۔
