اسلام آباد۔ 08 جنوری (اے پی پی) بنجائی وزیر داخلہ شیخ رشید احمد پارینے کہ وزیراعظم ہُرے پہ زو کوئٹہ غا کاہک، اپوزیشن نا برانز اٹ اڑاند شاغپنہ، ہراوڑنا رویہ ءِ اپوزیشن اختیار کیک اوڑتون ہمووڑ سلوک کننگک، بروک آ اِرا مسہ تُو اٹی سیاست اٹ اہم ءُ، وزارت داخلہ نا گام گیج و کڑد مون آ بریک، اپوزیشن نا بارواٹ ہراکہ پیش گوئی تے کرین راست پک مسر۔ جمعہ نادے آ داڑے نیشنل پولیس اکیڈمی ٹی صحافی تتون گپ وتران کرسا وزیر داخلہ پارے کہ حکومت امن و ایمنی نا حالیت آتے گچین کننگ کن پورو کوشست کننگ ءِ۔ اپوزیشن جماعت آک الیکشن کمیشن نا مون آ برانز کن بننگ نا پڑو ءِ کرینو، اوفتا برانز اٹ ہچ ءُ اڑاند اس شاغپنہ۔ ساڑی چیف الیکشن کمشنر گچین کاری کرفتنے تو اونا برخلاف برانز امر۔ اپوزیشن نا کیس نزور ءِ۔ اسہ سوج اسے نا ورندی ٹی اوپارے کہ وزیراعظم ہُرے پہ زو کوئٹہ غاکاہک۔ کنتون اوار کیہی وزیر آتا سلاہ ئس کہ او کوئٹہ غا کائے۔ دُن تو او داکان مست کوئٹہ غا ہِننگ نا فیصلہ ءِ کریسس۔ وزیر داخلہ پارے کہ بروک آ اِرٹ آن مسہ تُو سیاست اٹ اہم ءُ۔ او میڈیا تون پدریسہ رابطہ ٹی مریک۔ وزارت داخلہ ٹی میڈیا سینٹر اس ہم جوڑ کننگ انگ ءِ۔ اسہ سوج اسے نا ورندی ٹی اوپارے کہ اسلام آباد اٹی ورناتا پولیس نا دوتیان زوال اسہ سنگین ءُ واقعہ و ڈوہ اسے۔ داواقعہ ٹی اسہ ورناس دنیا ءِ الا ہرابھاز است ہسون ءُ واقعہ اسے۔ دزگیر پنچ کارندہ غاتون دہشت گردی نا دفعہ غاتے خلنگانے۔ اسہ سوج اسے نا ورندی ٹی اوپارے کہ وزارت داخلہ نا گام گیج و کڑد نظر بریک و وزارت ایمانداری و شفافیت اٹ تینا کاریم ءِ کیک۔ اوپارے کہ اپوزیشن جماعت آتا حکمت عملی نا بابت ای انتس کہ پارسا کریٹ او راست پک مس۔ ای چار ہیت پاریسٹ اسٹ داکہ دا ضمنی گچین کاری تیٹی بشخ ہلیرہ، داہلنگ ءُ، ارٹ میکو دا کہ سینیٹ گچین کاری تیٹی بشخ ہلیرہ، ہلنگ ءُ۔ مسٹ میکو دا کہ استیفہ تفسہ، تفسہ و چارمیکو دا کہ دالانگ مارچ اکن اسلام آباد آ بریرہ، بننگ ءُ۔ اپوزیشن ہراوڑنا رویہ اختیار کیک اوڑتون ہمووڑ رویہ سلوک کننگک۔
