اسلام آباد۔ 07 جنوری (اے پی پی) پی آئی اے نا ترجمان پارینے کہ کراچی نا چندی علاقہ غاتیٹی برجا برانز و سڑک آتا بند مننگ نا سوب آن فلائٹ آپریشن زہمی مسنے، کراچی آن روانہ مروک آ چندی جہاز آک منسوخ و تاخیر نا گواچی مسنو۔ ترجمان پی آئی اے عبداللہ خان نا کنڈآن پنچ شنبے نادے آ جاری اعلامیہ نا رداٹ کراچی ایئرپورٹ نا کسر تیا ٹریفک نا سوب مسافر و عملہءِ سرمننگ اٹ مشکل مون تروک ءِ، حالیت آتا سوب آن کراچی آن روانہ مروک آ چندی جہاز آک منسوخ یا تاخیر نا گواچی مسنو۔ ترجمان پارے کہ کراچی آن جہاز آتا منسوخی یا تاخیر نا سوب ملک انا تہہ ٹی ایلو جہاز آک ہم زہمی مسنو۔ کراچی و اسلام آباد نا جہاز پی کے 368و 369، کراچی و لاہور نا جہاز پی کے 304 و 305 ءِ منسوخ کروئی تمانے وخت اس کہ کراچی و اسلام آباد نا جہاز آک پی کے 308 و 309 اِراگھنٹہ تاخیر نا گواچی مریرہ۔ ہنداوڑ پی کے 308 تاخیر اٹ 6 بجہ غا شام انا روانہ مریک و پی کے 309 نن نا 9 بجہ غا روانہ مریک۔ ہنداوڑ کراچی آن پشاور پی کے 350و کراچی آن فیصل آباد پی کے 340 تاخیر اٹ شام انا 6 بجہ غا روان مریرہ۔ ترجمان پارے کہ کراچی آن دبئی جہاز پی کے 213 ہم یک ونیم گھنٹہ نا تاخیر آن روانہ مریک۔ غٹ مسافر آتیان خواست ءِ کہ او وخت آ معلومداری کن فلائیٹ انکوائری یا پی آئی اے کال سینٹر تون رابطہ ٹی مریر۔ اُراتیان فلائیٹس آتیکن پیش تمنگ کن وخت اس تخسا پیش تمر و کال سینٹر 111 786 786آن معلومداری ہلیر۔
