اسلام آباد۔ 07 جنوری (اے پی پی) خصوصی کمکار جان جوڑی ڈاکٹر فیصل سلطان پارینے کہ فرنٹ لائن ورکرزو ہیلتھ پروفیشنل آک ننا ہیروک ءُ، کورونا دین انا توننگ اٹ اوفتا کڑد بے مٹ ءِ، حکومت اوفتا خذمت آتے قدر انا نظر اٹ ہرک، حکومت فرنٹ لائن ورکرآتا زند انا رکھ ءِ اولیت ایتک۔ پنچ شنبے نادے آ فرنٹ لائن ورکرآتا خذمت نا بابت اڈ ہلوک آ سیمینار آن تران کرسا اوپارے کہ جہانی دین انارداٹ داڑآن زیات اہم کاریم پین ہچ اس الوکہ۔ و اودے ہیلتھ ورکرآک جوانی اٹ پورو کریر۔ ہراڑآ اوفک شاباش و ہروڑنا ایوارڈ نا حقدار ءُ۔ مچ آ دنیا ٹی ہراڑے لس بندغ ءِ اُراٹی رہینگ انگ و رکھ مننگ نا پارت ئس، ہموڑے فرنٹ لائن ہیلتھ ورکرآتے تینا کاریم آ ساڑی مننگ نا گرج ئس۔ ہرااو تینا جان ءِ خطرہ ٹی شاغسا پورو کرسا کریر۔ پاکستان کورونا دین انا توننگ کن گچین گام گیج کرینے۔ دنیا ننا سرسہب گام گیج آتا ستاءِ کرینے۔ ہیلتھ کیئر ورکرآک تینا زند ءِ خطرہ ٹی بٹسا قوم انا خذمت ءِ کرینو۔ ڈاکٹری اسہ مقدس ءُ پیشہ سے اوفتا شرف ءِ مچ آ راج کیک۔ اوپارے کہ دا دود انا مسخت ہیلتھ کیئر ورکرآتا منت واری ءِ ہرفنگ ناءِ۔ دنیا ءِ حیرت ئس کہ اسہ پدتموک ءُ ملک اس کورونا ءِ داخہ در جوان وڑاٹ امر سنبھالانو۔ اول اٹ دنیا ءِ شک و شبہ مس اوکان پد پیدوار مس۔ غٹ آن اہم گڑا اسہ سوگو ریسپونس ئس۔ ریسپونس اٹ سائنس و ڈیٹا نا زی آ سیبو نا اہم ءُ کڑد اس ئس۔ ہیلتھ کیئر ورکرآتا تیاری اسہ آسان ءُ کاریم اس اف۔ مچ آ دنیاٹی 25 سال نا ورناہراتم ڈاکٹر مریک 80 سال انا بندغ اودے ڈاکٹر صاحب پاہک۔ اوپارے کہ ننا ہیلتھ ورکرآتا شرف ہنداخاطرآن ءِ کہ او تینے خطرہ ٹی بٹسا مون آ بسر۔ ننا ڈاکٹر آتا کنڈآن دادین اٹی جان تا قربانی ءِ ہم تننگا۔ اینو نمے غٹ ءِ خراج تحسین پیش کننگ خوانہ۔ ہمو راج ہرا تینا نزور تپہ نا خیال ءِ تخک ہمو مون آ کاہک۔ نمے غٹ ءِ شاباش! آن بیدس ہچ پاننگ مفک۔
