پاکستان اٹی سعودی عرب نا سفیر نواف بن سعید المالکی نا بنجائی وزیر ہوابازی غلام سرور خان تون اوڑدہی

اسلام آباد۔ 06 جنوری (اے پی پی) پاکستان اٹی سعودی عرب نا سفیر نواف بن سعید المالکی بنجائی وزیر ہوابازی غلام سرور خان تون اوڑدہی کرے، اوڑدہی ٹی ہڑتوم آ ملک آتا نیام اٹ ہڑتوم آ کنڈآتا تعلقداری آ گپ وتران کننگا۔ ایوی ایشن ڈویژن نا کنڈآن جاری اعلامیہ نا رداٹ ایوی ایشن نا بابت ہڑتوم آ ملک آتیٹی پین گچینی کن گام گیج کننگ آ گپ وتران کننگا۔ بنجائی وزیر قطر و سعودی عرب نا تعلقداری تا بحالی آ سعودی سفیر ءِ مبارکباد پیش کرے۔ بنجائی وزیر خلیجی ملک آتیٹی پیش رفت نا خیرمقدم کرسا اودے ڈیہہ نا شونہالی و امن اٹ گچینی کن ستاکڑزوک گوندا۔ بنجائی وزیر پاکستان و سعودی عرب نا نیام اٹ سوگو و برادرانہ تعلقداری تے پین سوگوی تننگ نا عزم انا درشانی ءِ کرے۔ پاکستان نا کنڈآن سعودی عرب اٹی ابھا شار اکن پوسکن آ فلائٹس آتا بناءِ کننگ نا باندات آ ہم شرہ مس۔ بنجائی وزیر پارے کہ ابھاکن ہفتہ ٹی اِرا جہاز چلیفنگک۔ داڑآن ہڑتوم آ ملک آتا دوستانہ تعلقداری و سیل و سوات اٹی پین ودکی مریک۔ سعودی سفیر دا بابت زوت گام گیج آتا یخین دہانی کرفے۔ سعودی سفیر کورونا دین اکن پاکستان نا کنڈآن کروک آ گام گیج آتا ستاءِ کرے۔ اوپارے کہ حالیت آتا گچین مننگ تون ہی عمرہ زائر آتیکن زوت فلائٹس آتا بناءِ کننگک۔ ہڑتوم آ راہشونک کورونا دین انازوت چٹفنگ کن دعا کریر تانکہ دا سال حج انا ادائیگی جوان وڑاٹ کننگ مرے۔