اسلام آباد۔ 04 جنوری (اے پی پی) بنجائی وزیر حوالکاری و شینکاری سینیٹر شبلی فراز تون کیوبا نا سفیر گیبریل ٹیل کیپوٹ سپاروکی اوڑدہی کرے ہراٹی چندی باندات آ گپ وتران کننگا۔ بنجائی وزیر حوالکاری سینیٹر شبلی فراز دودوربیدہ نا بشخ اٹی کمکاری آ زور شاغسا پارینے کہ پاکستان عظیم ءُ دودوربیدہ میرات اسے نا امین ءِ، دودوربیدہ و میڈیا نا بشخ آتیٹی ہڑتوم آ کنڈآتا کمکاری ءِ مون آ دننگ اٹ کمکار مریک۔ اوپارے کہ پاکستان و کیوبا نا نیام اٹ خوشگوار تعلقداری ءِ۔ وزیر حوالکاری 2005 اٹی پاکستان نا زمی جمب آن بھاز بے وڑ زہمی مروک آ علاقہ غاتا طالب علم آتے طبی بشخ اٹ پیش کروک آ اسکالر شپ آ کیوبا نا سفیر نا خصوصی وڑاٹ منت واری ءِ ہرفسا پارے کہ پاکستانی طالب علم آتا بھلو کچ اس دا طبی اسکالر شپ آن فائدہ ہرفینو۔ اوپارے کہ کیوبا نا الس اسہ باہمت ءُ قوم اسے ءُ ہرافک گوازی، سازوزیمل و طب انا بشخ آتیٹی نمان خذمت سرتسر۔ کیوبا نا سفیر کیوبا و اونا الس نا بارواٹ وزیر حوالکاری نا خیال آتا ستاءِ کرے۔ کیوبا نا سفیر ہڑتوم آ ملک آتا الس نا تین پہ تینی فائدہ کن کیوبا و پاکستان نا نیام اٹ چندی بشخ آتیٹی معاہدہ غاتیا عملدرآمد نا گرج آ زورشاغا۔ ہڑتوم آ کڑدہ غاک کوویڈ۔ 19 دینی مرض انا مقابلہ ءِ کننگ کن تینا حکومت آتا گام گیج آتیا گپ وتران کریر۔ وزیر حوالکاری کیوبا نا سفیر کن تینا آخبت نا سفارتی زمواری تا بارواٹ نیک است خواہی نا درشانی ءِ کرے و اومیت کرے کہ او تینا پاکستان نا اڈکننگ اٹی جوان انگا یات آتے تین تون تخک۔ اوڑدہی ٹی وزارت حوالکاری و شینکاری نا بڑزکو کمامدارآک ساڑی ئسر۔
