اسلام آباد۔ 06جنوری (اے پی پی) اسپیکر قومی اسمبلی اسد قیصر پارینے کہ مشکل حالیت آتامقابلہ ءِ کننگ کن پارلیمنٹ نا کڑد بھاز اہم ءِ، وخت بسنے کہ نن الس تون کروک آ قول آتیا عملدرآمد کننگ کن غٹ وسیلہ غاتے کاریم اٹ اتین، قومی اسمبلی نا دیوان ءِ بٹنگ انگ کن اپوزیشن جماعت آتون سلابت نا عمل ءِ مون آ دینہ۔ او چارشنبےنا دے آ اسپیکر ہاؤس اٹ حکومتی راہشون تا دیوان نا کماشی ءِ کریکہ۔ دیوان اٹ بنجائی وزیرپرویز خٹک، شاہ محمود قریشی، اسد عمر و شفقت محمود تون اوار حکمران جماعت نا قومی اسمبلی ٹی چیف وہپ ملک عامر ڈوگر، وزیر مملکت علی محمد خان و وزیراعظم نا سلاہکار پارلیمانی امور ڈاکٹر بابر اعوان ئسک بشخ ہلکر۔ دیوان اٹی پارلیمانی امور تون اوار ملک انا سیاسی، زرگزرانی و کورونا دین انا بابت باندات آ سرجم گپ وتران کننگا۔ دیوان اٹی قومی اسمبلی نا دیوان ءِ بٹنگ انگ و اپوزیشن جماعت آتا پارلیمانی راہشون تتون سلابت آہم سجفنگا۔ داوخت آ اسپیکر قومی اسمبلی پارے کہ بطور السی نمائندہ نا داسہ وخت بسننے کہ نن الس تون کروک آ قول آتیا عملدرآمد کن تینا غٹ تر ہروڑ نا وسیلہ غاتے کاریم اٹ اتین انتئے کہ مشکل حالیت آتا مقابلہ ءِ کننگ کن پارلیمنٹ نا کڑد بھاز اہمیت تخک۔ اوپارے کہ کورونا نا اولیکو ریسہ ٹی پارلیمنٹ نا کڑد بھاز جوان مسنے۔ بنجائی وزیر آک زوت وزیراعظم عمران خان تون اوڑدہی کیرہ اوکان پد قومی اسمبلی نا دیوان ءِ بٹنگ انگ نا بابت حتمی فیصلہ کننگک۔ اوپارے کہ ای خواوہ کہ کانود سازی نا عمل مون آ کائے و قومی اسمبلی نا پارلیمانی سال انا دے تے پورو کننگ ہم آئینی خواست ءِ۔
