لاہور۔ 06 جنوری (اے پی پی) وزیراعظم عمران خان نا خصوصی کمکار سیاسی ابلاغ ڈاکٹر شہباز گل پارینے کہ شہباز شریف میٹروبس انا غیر کانودی ٹھیکہ تس، داٹھیکہ نا ہیت ءِ کننگ آ کنا برخلاف شہباز شریف نا من پسند کمپنی کیس دائر کرے۔ چارشنبےنادے آ جوڈیشل کمپلیکس اٹ میڈیا تون گپ وتران کرسا اوپارے کہ میٹروبس ڈٹ اٹ شہباز شریف انتہاکرپشن کرے، اوہراتم ٹھیکہ ءِ تس تو اسہ کمپنی اس ٹینڈر ءِ پُرکرے وخت اس کہ ننا حکومت میٹروبس انا ٹینڈر ءِ بھاز کم نہاد اٹ تس، ہمو ٹینڈر ءِ شہباز شریف 100 درسد کُبین تس۔ ڈاکٹر شہباز گل پارے کہ ای کمپنی نا برخلاف نجی ٹی وی ٹی راستکی تے بیان کریٹ تو کمپنی کیس دائر کرے۔ اوپارے کہ داسہ تحریک انصاف نا حکومت اٹ مسہ کمپنی بولی ٹی اوار مسر۔ اسہ سوج اسے آ ڈاکٹر شہباز گل پارے کہ ای امریکہ ٹی خوانفنگ ءِ ہلسا پدی تینا ملک آ بسونٹ، داسہ ای وزیراعظم عمران خان تون اُٹ، اسہ کیس اس کیر یا دہ پرواہ اف۔ اوپارے کہ وزیراعظم عمران خان نا پرمان آ السی پیسہ غاتے بچفنگ انگ ءِ۔
