اسلام آباد۔ 06 جنوری (اے پی پی) کورونا نا دین اتون مون تننگ نا کوشست آتیٹی اسٹیٹ بینک انا وام موخر و ری شیڈول کننگ نا اسکیم نا رداٹ داتم اسکان 6 کھرب 57 ارب 15 کروڑ 40 لکھ روپئی نا وام تے اسہ سال اکن موخر کننگانے۔ اسٹیٹ بینک انا کنڈآن دا بابت جاری کروک حساب وکتاب نا رداٹ اصل زر انا زرتس ءِ اسہ سال اکن موخر کننگ نا اسکیم نا رداٹ یکم جنوری 2021اسکان اسٹیٹ بینک ءِ 16لکھ، 68 ہزار 534 درخواست موصول مس ہرافتا زمہ واجب الادا وام تا کچ 25 کھرب 24 ارب 44 روپئی ءِ، دافتیان 16 لکھ 6 ہزار 447 درخواست آتا منظوری ءِ تننگانے و 6 کھرب 57 ارب 15 کروڑ 40 لکھ روپئی مالیت نا وام تے اسہ سال اکن موخر کننگانے۔ ہنداوڑ دا اسکیم نا رداٹ 2 کھرب 21 ارب 870 کروڑ 8 لکھ روپئی آن زیات نا وام تا ری سٹرکچرنگ، ری شیڈولنگ نا منظوری ءِ تننگانے۔ دا اسکیم نا رداٹ صارف وام تا اصل زر ءِ اسہ سال موخر کننگ نا مشروط موکل تننگانے۔ داآسراتی ہمو صارف آتیکن ءِ ہرافتا زرتس ءِ 31 دسمبر 2019ء اسکان باقاعدہ مروئے۔ وام زرتس موخر کننگ آ بینک ہچ ءُ فیس یا سود چارج کپک۔ بینک داٹی بیرہ سود یا منافع نا وصولی ءِ کننگ کیک ہرا صارف سود یا منافع نا زر اداکننگ کپ او ری سٹرکچر نا درخواست کننگ کیک۔ وام تے موخر یا ری شیڈول کننگ آن کریڈٹ ہسٹری زہمی مفک۔
