لندن۔ 06 جنوری (اے پی پی) برطانیہ ٹی کورونا دین آن زہمی بندغ آتا کچ 27 لکھ 74 ہزار آن زیات مس، ملک اٹی داتم اسکان ہلوک آ دین آن 76 ہزار آن زیات بندغ زوال کرینو، اسہ دے اٹی پوسکن آ پک مروک کیس آتا کچ 60 ہزار آن ودا۔ چارشنبےنادے آ برطانوی میڈیا نارداٹ ملک اٹی کورونا زہمی تا جم کچ 2774479اسکان سرمسنے۔ برطانیہ ٹی دا ہلوک آ دین آن داتم اسکان 76305بندغ زوال کرینو۔ ملک اٹی کورونا نا فعال کیس آتا کچ 12697394ءِ۔ اوڑے برطانوی نشریاتی ادارہ نا رداٹ کورونا دین انا بناآن داتم اسکان برطانیہ ٹی اولیکو وار اسہ دے اٹی پوسکن آ پک مروک کیس آتا کچ 60 ہزار آن ودانے۔ تازہ انگا حساب وکتاب نا رداٹ برطانیہ ٹی پنجا آن اسہ بندغ اسے و لندن اٹ 30 آن اسٹ ءِ کورونا دین ءِ۔ داحالیت آتا سوب پوسکن آ لاک ڈاؤن نا حالیت اٹ سخت پابندی تا پڑو ءِ کننگانے۔ برطانوی وزیراعظم بورس جانسن پارینے کہ برطانیہ ٹی سینزدہ لکھ بندغ ءِ کورونا دین آن بچفنگ نا ویکسین خلنگانے۔ داٹی 23 درسد ہمو بندغ آک ہم اوار ءُ ہرافتا وئی 80 سال آن زیات ءِ۔ اوپارے کہ داوخت آ ملک اٹی دہ لکھ آن زیات بندغ کورونا غان زہمی ءُ و ہسپتال آتیٹی دین انا اولیکو ریسہ نا نسبت 40 درسد زیات ناجوڑ ساڑی ءُ۔ برطانوی حکومت نا چیف میڈیکل ایڈوائزر پروفیسر کرس پارینے کہ ڈیٹا آن معلوم مریک کہ دین تالان مسنے و حالیت آک دادو کہ ملک اٹی اندازا 50 آن اسہ بندغ کورونا نا گواچی ءِ و دا ملک انا گڑاس بشخ آتیٹی زیات ءِ و گڑاسے ٹی کم ءِ۔
